|
يوللاري يوروب گلميشم،
گزه - گزه، سينله داغلار.
گۆل چيچكلر گتيرميشم،
اتگينه چينله، داغلار!
اوزاقلاردا توزوم قالدي،
دؤران مني ظولمه سالد‌‌ي،
ياريمي اليمدن آلدي،
ياغي گلدن كينله داغلار!
ائل منيم درديمي بيلدي،
گؤزلريمدن ياشي سيلدي.
صولتيم انكار ائديلدي،
سن ده آغلا، اينله، داغلار!
ياد گؤزۆنده سؤزۆم اوخدور،
غميم وار، سئوينجيم يوخدور.
دۆزگۆنۆن نيسگيلي چوخدور،
آل كؤكسۆنه دينله، داغلار!
قاشقايي
لوحه‌لري - ص 29 .
|
