او قيزلاركي، اوياناردي، يوخودان،
سحر واختي نغمه سيله سازلارين.
سۆزۆشه‌ردي لطافتله حوووضا،
و چيمه‌ردي يانلاريله قازلارين.
او قيزلار كي محبتله آزادجا،
بؤيۆيۆبن آچميشديلار قول - قانات،
گؤر نه ظولوم، نه شقاوت گؤردۆلر،
قيلدي اسير اونلاري گؤر نئجه تات!
او قيزلار كي ائشيتمه‌زدي هئشجه سؤز،
گۆلدن آغير ياشاييشين بويوندا.
ائشيتديلر ايندي نه‌لر، گؤر نه‌لر،
وورولوب گؤر نئجه تهمت اونلارا.
او قيزلار كي همدم ايدي گۆللرله،
ياتيشاردي آغوشوندا گۆللرين.
مسكن ساليب گؤرۆن نئجه يئرلرده،
ايندي اولوب سۆرگۆن خاري ائللرين.
او قيزلار كي قوجاغيندا آنانين،
بئجه‌ريبن گؤرۆردۆلر ناز - نعمت،
ديله‌نيرلر قاپيسيندا كيملرين،
گؤر اونلاري نئجه آليب زور ظلمت.
او قيزلار كي گؤزه‌للكيده - حۆسنده،
تاپيلمازدي ميثاللاري دۆنيادا،
گؤرۆن نئجه آتيليبلار نظردن،
كيمسه ايندي رغبت قيلمير اونلارا....
كيچيك شعرلر - ص 34 - 30 / 2 / 1344 .
