بس ائشيتمه ميسن، ائلين آغزيندان،
«هر زادين تازاسي دوستون كۆهنه‌‌سي»؟
التفات ائت منله ياناش، آي گؤزه‌ل!
قوروتما لبيمده سۆزه‌ن هوسي.
باغلارلارمي كۆسۆ ايللر بير سؤزله؟
اؤتن اؤتۆب، كئچن كئچدي سئوگيليم.
مرحمت قيل يازيق بۆلبۆللرينه،
ياد باغلاردا گزمه منيم اؤز گۆلۆم.
قدم باسسان بير آن بيزيم ائوميزه،
آياغين آلتيندا قوربان اولاريق.
قاداني آلاريق ها قالسان بيزده،
گئتسنسه، حؤرمتله يولا سالاريق.
يادلاردا نه گؤردۆن اونوتدون ائلي؟
انتظاردا قويدون ايللرله بيزي؟
رحم قيل ويرانا باغلار حالينا،
قويما بير باش ايتسين بوردا عشق ايزي.
انتظار گؤزۆمۆز قاراليب داها،
جانيميزي ياخيب حسرت آتشي.
نولار يول گؤسترسن سحر، داغ آردي،
بوردادا بير دوغا عشقين گۆنشي.
گل گؤزه‌ل، گل گؤزه‌ل اؤز وطنيوه،
اولار قيمتيوي بورادا بيلن.
گل گؤزه‌ل اؤز باغ و باغچاندا ياشا،
اؤلسنده، اؤلمگه ياخشيدير وطن!
كيچيك
شعرلر - ص 35 - 23 / 2 / 1343 - ناهران
كندي .
