عاشيق سوسما، تيتره‌ت قيزيل، تئللري،
تسخير ائله اۆره‌گيمي، روحومو.
زخمه‌لري قالدير، يئندير بير به بير،
داد فعانا - سيزا گتير هر سيمي.
عاشيق بيلمه‌م نه سيرر وار سيمينده،
سيزلاياندا، گيزيلديري اۆره‌گيم.
سسله‌ننده بيز - بيز دورور تۆكله‌ريم،
ياتميش ايدي اعماغيندا ايسته‌گيم.
قاناد باغلير روحوم اوچور گؤيلرده،
قوشلار ايله بولوتلاردان اؤتۆشۆر.
ترپنجك بير دفعه سيمين، مين كره،
پرده‌لرده سئيران ائديب گزيشير.
منيم روحوم دويور سنين درديوي،
سوسما، سيزلات باجارديقجا سازيني.
سيزلات - سيزلات اۆچۆمۆزده ياش تؤكك،
تا يئتيره‌ك محبتين يازيني.
عاشيق مين سيرر ياتيب سنين سازيندا
قانارمي هر انسان سانان اؤزۆنۆ؟
سن سئودالي، من سئودالي، ساز ده لي،
سن دئييرسن سازدا سؤزۆن دۆزۆنۆ.
قوربان سنين اللريوه، سوسما چال،
درتلي‌لردن قوراجاغام ييغينجاق.
چال، قوي آشسين باغيرتيميز داغ – داشي،
دورنالارلا اوچوب گئتسين ان اوزاق.
سوسما چال كي قارا بولود يان گئده‌ر،
قيزيل گۆنش آخير دوغار سمادا.
محبّتين چيچك‌لرين بئجه‌رده‌ر،
سئوداليلار گۆنه چيخار دۆنيادا.
بيزله سندن سونرا، سيرداش كيملردير،
بودؤره ده عاشق ده‌لي سازينا؟
قورخما نه‌دن، آنلاييريق آنجاق بيز؟
سازين، سيزين، سؤزۆن، دردين بورادا!
آغريما هئچ شيشكي‌دن، سخره‌دن،
سن درتلي‌سن وئرمه باها اونلارا.
باجارديقجا قالدير گؤيه سيزيوي،
همدم ائله آزاد اوچان قوشلارا.
كيچيك
شعرلر - ص 109 - 11 / 2 / 1343 - خنيه كندي .
