شعريمين اينجي‌سين من دۆزه‌جگم
باغيشلا اوستاديم، شاعيرم منده.
خلقيمين ايشچي‌سي، سيلاحچيسييام،
ساخلانير اۆره‌گيم بو گۆل وطنده.
دايقالار آخميشام خلق آخينينا،
ازل گۆندن اوردان ايلهام آلميشام.
گزميشم داغلارين آذربايجانين،
ساعاتلار بو يئرده فيكره دالميشام.
سرين بولاقلاردان خيلي ايچميشم!
اوبالاردا قوناق اولموشام، آي چوخ!
گنجليگيم بورادا گۆللنيب، دئنه،
كؤنلۆمده ذره‌جه منيم قورخو يوخ!
منيم هۆندۆر آتيم بۆدره‌ميه‌جك،
آشاجاق تپه‌ني، دره‌ني، داغي.
ابدا كي قارشي دورانماياجاق.
مصري قلينجيما آزغين گؤز ياغي.
بير الده بايراغيم، بير الده شعريم،
چاپاجاغام آتي ان اوجالاردا.
آسيا خلقلرين قورتاراجاغام،
گئده‌جگم داها بيلميره م هارا.
پولاد قوللاريملا قايتاراجاغام،
يئنيدن آنامين باهار ياشلارين.
آجي دۆيۆنلردن قورتاراجاغام،
اونون او زيل قارا چاتما قاشلارين.
گۆلـله‌لنميه‌جك باشماقچي «علي»
ائللر آرزوسو گۆل لنه‌جكدير.
قبيري اۆستۆنده «خياباني»نين
سعادت يئلكني يئلله‌نه‌جكدير.
كندلردن قالخاجاق «آذر اوغلو»لار
قالماياجاق شاعير قوينوندا الي،
سعادت نغمه‌سي يازاجاق هامي.
اسگيك اولماياجاق كيمسه‌نين ديلي.
دئينه نامرد يادا هئچ زامان منيم،
اۆره‌گيم سويوق داش اولماياجاقدير.
دئينه منيم ايگيد كوراوغلو بالام،
اؤزگه توپراغيني آلماياجاقدير.
دئينه بوردان قالخان ابدي اودلار،
تامام آسياني بۆرۆيه‌جكدير.
امپراتورلوغو بويوندوروقلا،
دنيز‌لره ساري سۆرۆيه‌جكدير.
مجموعه 1 - ص53
- 1354 .
