سحرله اويانيب اوزون يول سۆرن،
يومشاق قوملارا ايزسالان بلوچ.
گۆنشله سۆرۆنۆب داغ - دره واران،
يالين قايالارلا ووروشان بلوچ.
آي ائلين – اويماغين ترك ائديب گئده‌ن،
سؤيله كيملر سني در به در قيلدي؟
هر آدديم اوتوروب درين آه چكن،
سؤيله كيم نشترله باغريوي دلدي؟
چيرپيندين يايي – قيش اودلو يئللرله،
ساوروق تالالاري اولدولار يلين.
صاباحي سيلكيندين، گئتدين ها گئتدين،
قانلي جنگللرده مسكن ائيله‌دين.
داباني نين قالين قابارلاريندان،
قان آخدي يول اۆزره، قيزيل ايز سالدي.
لهلييه - لهلييه جان هايي ايله،
سن اؤتدۆن، قيرميزي اشاره‌ن قالدي.
گئجه‌لر اوتوردون قارا كومادا،
گه‌وه‌نين شعله‌سين اوزاقدان گؤردۆم.
دؤنجك «اود يوردونا» گؤزۆم اودلاندي،
قانيوا – اودووا من جواب وئرديم.
دئييرم كي چوخدا اوزاق دئگيليك،
يولوموزدا هرگاه اوچروم اولماسا.
هر گئجه بيز سيزده قوناق اولارديق،
نامرد آراميزدا سنگر سالماسا.
دئييرم: آي قارداش! گل اوجاق قوراق،
تامام ائل - اويماغي بير يئره ييغاق.
هايغيريب نامرده هجوم ائيله‌يك،
ظۆلمۆن اؤركنيني لاپ ديبدن قيراق.
بيليرم آي قارداش! او گۆن ياخيندير،
بو سؤزه اۆره‌كدن من اينانيرام.
ديله گه چاتاريق او شن زاماندا،
گله‌جك، گله‌جك، بونو آنيرام.
سحرين سسيله، شفق رنگيله،
آخاجاغام آخير كؤنلۆنه سنين.
ائليمين اودوندان محبّتيندن،
قوياجاغام اثر جانيندا درين.
مجموعه 1 – ص 68- دي آيي 1346.
