اوخويار كن سني آنا ديليمده،
ديله‌ميشديم قبرين گؤرمه گي، خيام!
ياشاسين انسانا قايغي، صداقت،
سن كيمي داهي‌نين ديله گي، خيام!
آچاراق خلقيوه حيات سيرريني،
ظلمكار شاهلارا قارشي داياندين.
خرابات ايچره بير پياله سئچدين،
سارايدان آيريلدين، ياندين، اودلاندين.
شريعت قالمادي هئچده قايغيوا،
سارايلار يانمادي سنين حالينا.
كمالات كسب ائتميش، لاكين «فضوليم»،
سير ائتديكجه سنين او كمالينا.
سنين غمين - دردين، اولو كدرين،
اۆره‌ك دؤيۆنتۆن‌ده بيزيمكي خيام.
بيليرسنمي منيم «كشوري»لريم،
اضطرابلاريندان آلميشلار ايلهام.
دوغرو دور كي قبرين كؤنۆللرده دير.
خيّاملار يئرلرده ياتاسي دئگيل.
اۆره‌كلر مۆلكۆنده ياشاييرسان سن.
آذربايجان سني آتاسي دئگيل.
اوچغون داخما - ص 26 - فروردين 1347 - نيشابور، خيامين
مزاري.
