هر زامان جور ايله جفا گؤردۆ،
دار دۆنياني بي‌وفا گؤردۆ.
سينادي دوستو دۆشمني ياري،
قاراني آغ، آغي قارا گؤردۆ.
جاني قوربانليق ائتديگي دوستو،
غئير ايله يار و آشينا گؤردۆ.
هر كيمه ياخشيليق روا بيلدي،
اؤزۆنه قارشي ناروا گؤردۆ.
ياري‌نين خسته‌سي، غمه دۆشگۆن،
يارا جان وئرمه‌ده شفا گؤردۆ.
گؤزلري ياشلي
قويدو اصحابي،
ترك قيلدي
حياتي زهتابي!
قلب، مظلوملوغون دويار آغلار،
خاطيرينه اونو سالار آغلار.
فرقتينده اونون دمادم، هي!
اۆره‌گيم قاورولار، يانار، آغلار.
غميني آشكارا چيخارمازسا،
كؤوره‌ليب قلب ايچينده زار آغلار.
قور سالار جانا آتش حسرت،
ياد گۆلر حاليميزا، يار آغلار.
آتاميز دۆنيادان كؤچۆب، دئيه‌رك،
دۆزگۆن، ائلدار، سهند، ياشار آغلار.
گؤزلري ياشلي
قويدو اصحابي،
ترك قيلدي
حياتي زهتابي!
يورد يواسيني بوش بوراخماياجاق،
آياق اۆستۆنده ار- ارنلر اوياق.
يولونا دوستلاري دوام ائده‌جك،
قوراجاقلار مزاري اۆسته اوجاق.
دئدي اونلارا كيم كيتاب اوخويون،
علمدير اسلحه، بيليكدي ياراق.
قورخمايين بيرگه توپلانيب يۆرۆيۆن،
مدني توپلو بير نشيده قوراق.
نوحه‌‌چي بير حزين سس ايله دئيير،
تؤكه‌رك گؤز ياشين آمان نه ساياق:
گؤزلري ياشلي
قويدو اصحابي،
ترك قيلدي
حياتي زهتابي!
تبريز يوللاريندا - ص 70.
