طبيعتي جانلات چيچك‌لر ايله،
باهار بايراميدير، باشلا اس آغ يئل.
بيرياندا قالخيبدير قيزيل‌لاله لر،
سن اسميرسن بوردا نييه بس آغ يئل؟
يوردومدان گئتمه‌يير سُست‌لۆگۆ قيشين،
قاباغا آپارير ظۆلمت اؤز ايشين.
اولما باتمايير بو ظاليمه ديشين،
وئر بو اؤلمۆش يئره بير نفس آغ يئل.
ساچمايير گۆنشي داي طبيعتين،
فرماني اؤتگۆندۆر قارا ظۆلمتين.
دۆشنده ياديما سنين قدرتين،
اويانير كؤنلۆمده مين هوس آغ يئل.
محبتدن يوخدور بوردا هئچ نه ايز،
يالتاقلار - ظاليملر اولورلار عزيز.
قالميشام وطنده يالقيز كيمسه‌سيز،
سن منيم سسيمه وئر بير سس آغ يئل.
گل باشلا ووروشو چيركين ظلمتله،
چاغير انسانلاري صاف محبّتله.
ايستي أسيب، يئري قوروت حدّتله،
قاراقيش اۆر‌كنين ديبدن كس آغ يئل.
كور يوخودان اويالت يازيق سارواني،
ايزله‌سين ده وه لر قوي بياباني.
پئشوازا چاغيرسين مينلر انساني،
سسلننده كارواندا جرس آغ يئل.
خئيلي واختدير آجي مئحلر اسيبدير.
آغير - آغير شپه يوردو باسيبدير،
سئوگيليمين يولون پالچيق كسيبدير،
دۆزگۆنۆن خطرينه گل بير اس آغ يئل.
اوچغون داخما - ص 27 - 16 / 2 / 46 - مهرام.
