كؤكسۆمده چيرپينان توفانلي اۆره‌ك،
يئني سيخي، يئني غربت ايسته‌يير.
يئني درد، يئني سؤز، يئني حادثه،
يئني ايشيق، يئني ظلمت ايسته‌يير.
قولاغيم تشنه دير، يئني سؤزلره،
بولانليق سولاردان قوي نجات تاپيم.
بوراخ وورسون دنيز يئني دالغالار،
قوي يئني كؤپۆكلر آغزيملا قاپيم.
داها قول قويمارام اسكي دبلره،
تازه‌ليك آجيدير وجودوم بۆتۆن.
ايستيرم بو ماوي ياشيل سمايا،
امليمله وورام يئني بير سيتون.
يوخسا قايتار مني أن اوزاق يئره
اسكي انسانلارين چيلپاق دؤورۆنه.
اوردا كي نه ياخشي، نه پيس يوخ ايدي،
قاييديم قوي داغي من يئنه - يئنه!
اوچغون داخما - ص 29 - 3 / 1 / 46.
