آخيجي لهجه‌لي گؤزه‌ل فارس قيزي،
دينله گؤر نئجه خوش صدالييام من.
زردۆشتۆن يوردونون اودلو چيچگي،
طبيعتين پارلاق جمالييام من.
سنيندير اۆره‌گيم، سنيندير جانيم،
ازلدن سنينله قايناييب قانيم.
سنين دوستلوغوندور عزّتيم شانيم،
منه التفات ائت، وفالييام من.
يولونا تيكميشم وورغون گؤزۆمۆ!
سنه قربان وئرره‌م اينان اؤزۆمۆ؟
محبت آختارسان، ايزله سؤزۆمۆ،
دوستلوغون باشليجا مقالييام من.
شيرين - اينجه ديللي گؤزه‌ل فارس قيزي!
ديليمده سؤز واردير، كؤنلۆمده سيزي.
سئوگي يوردونون بير پارلاق اولدوزو،
محبتين عشقي كمالييام من.
بيليرسنمي كيمم؟ كوراوغلو دؤلۆ،
دوداغي سؤز آجي، اۆره‌گي دولو،
محبت باغي‌‌نين دردلي بۆلبۆلۆ،
سئوگي دۆنياسي‌نين هلالييام من.
ائليمه دئييرلر آذري آئلي،
ديليمه ايسه آذربايجان ديلي.
مبارز ائللرين آرخاسي بئلي،
تاريخين شوكت و جلالييام من.
هر آخشام واراندا لاله‌لي دۆزه،
سني ديله‌ييرم من گزه - گزه.
محبتلي ال له قوناق گل بيزه،
نه واخدير سنينله آرالييام من.
عاشيقم او سۆزگۆن آلا گؤزۆنه،
كؤنلۆمۆ اوخشايان دوزلو سؤزۆنه.
باشقا بير كسله يوخ، دئييم اؤزۆنه،
منه ظۆلم ائيلمه يارالييام من.
اوددور بوردا بۆتۆن آخيش، دۆز، چيمن،
سئويرسنسه مني بير كره ديللن.
نييه گيزله‌ييرسن سيرر سؤزۆن مندن،
اۆره‌گيندن سنين كي حالييام من!
دۆزگۆن گليب سنين جفاندان ديله،
دئييرسن تكي بير عشوه‌لي گۆله:
حقارتله نييه باخيرسان بئله،
دردليلرين غمي - ملالييام من.
اوچغون داخما - تبريز - ص 37 - 1346.
