خوش گلدين دۆنيايا ياشاريم منيم.

وطنين بو آغير قانلي آييندا،

چاتارسانمي هايا ياشاريم منيم؟

قوي بۆتۆن آنالار اوغول دوغاندا،

اۆميدلرله دولو «‌‌ياشار»‌ سؤيله‌سين.

قهرمان اوغلونو اونودماز وطن،

گله‌جك سنيندير آياشار، سنين.

گله‌جكله منيم اوزون ايللردير،

واريمدير بير قيزيل عهد و پيمانيم.

قانيملا يازميشام كؤنلۆم اوجوندا،

نيسگيليم، آمانيم، كؤنلۆم، ايمانيم.

من اؤلرسمده، سن آياق باس گيلن،

قانلي قيزيل آياق گؤزه‌ل تبريزه.

قاريش به قاريش گز، دولان وطني،

گل سنده عاشيق اول ازل تبريزه.

قوي قابارلي أللر، پولاد بيلكلر،

سني سلاملاسين «‌‌عشق اولسون!» دئيه.

تانكيوين آلتيندا أزيلسين شاهلار،

تاريخين اؤنۆنده باش أگه - أگه.

اي منيم فيدايي آرزولو اوغلوم!

سنده اوختايلارين عينادين گؤرۆم.

آتان كور ياشاييب، كوراوغلو بالام،

ياشاسين ايللرله بو آدين گؤرۆم.

سنين نسلين اوغلوم، گؤزۆن آچاندا،

درس ده اوخوياجاق آنا ديلينده.

بايراغيميز اركده هاوالاناندا،

سيتم قالماياجاق وطن ائلينده.

نيسگيللي اۆره‌كلر آرزوسو اوغلوم!

منيم شعريم، منيم كؤنلۆم داديسان.

بو گۆنش، بوهاوا، بويئر سنيندير،

آتاوين-آناوين سن موراديسان.

اوچغون داخما - تهران، 16 آذر 1356 - ص 63.