رمضان آيي‌‌نين اون آلتيسيدي،
مين اۆچ يۆز اوتوز بئش هيجري ايلينده.
ارمني قودوردو، داشناك قودوردو،
اورمودا اوينادي بئرنو الينده.
جمعه گۆنۆ آخشام، گۆن باتان چاغي،
اورمودا گزيردي روس سالداتلاري.
شهره گتيرديلر نفت ناسوسلاري،
اودا چكه‌جك ميش داشناك، بازاري.
وحشت ياراتديلار ايلك اؤنجه اوردا،
ووروب اؤلدۆردۆلر اون بئش نفري.
جوان، قوجا اوشاق، اللري يالين،
چؤللره سيغيندي آخشامدان بري.
سالداتلار شه‌هري قوروق ائتديلر،
آسوده غارته گيردي داشناكلار.
هر يانا ناسوسلا نفت سپه لندي،
تۆستۆ قالخدي گؤيه اودلاندي بازار.
چيخارتديلار روسلار
مالي شه‌هردن،
بوشالدي دوكانلار تامام، او گئجه.
زرگرين، باققالين، يۆنچۆنۆن بۆتۆن،
آپارديلار مالين نامردجه‌سينه.
داشناك دسيسه‌سي، روس امري ايله،
گئجه سحره‌دك تالاندي اورمو.
شاعيرين اۆره‌گي نئجه يانماسين؟
آلاولار ايچيند آه ياندي اورمو.
بئرنو اويناديردي، داشناك ارمني،
اورمو فضاسيندا سحره كيمي.
آنالار فريادي قالخدي گويلره،
كسيلمه‌دي اصلا گۆلـله‌لر سسي.
دان يئريندن شفق ياييلانا دك،
داشيدي داشقالار مالي چؤللره.
گۆنش دۆشر - دۆشمز دنيزين اۆسته،
تيمچه‌لردن آلوو قالخدي گؤيلره.
اورمونون بازاري ياندي كۆل اولودو،
ارمني سيليردي تاريخيميزي.
او ائو‌سيز، اولوس‌سوز، يوردسوز، يوواسيز،
اوباسيز، وطن‌سيز ايسته‌يير بيزي.
آلچاق تپه‌لرده وورنوخان قوزغون،
قارتال يوواسيندا ياشايا بيلمز.
نامرد، مردي گؤرسه گۆن ايشيغيندا،
قارشيسينا چيخماز، قاباغا گلمز.
گۆن چيخار - چيخماز او اورمودان قاچدي،
شهري داغيتميشدي بايقوش نفسي.
اورمولويا قويدو اود، آلاو، جسد،
آنالار فريادي، گۆلـله‌لر سسي.
اورمور لوحه‌لري - ص 6 - 10 / 6 / 77 .
