بوتو - بوت‌پرستي ائيله‌ين يالان،
ظالملر قصرينه ولوله سالان.
شاهلارين شمشيرين اليندن آلان،
دالينجا گليره‌م يا رَسُول الله!
فصاحت اؤلكه‌سي سنله فخر ائدير،
ملاحت لشكري آردينجا گئدير.
خلقتده پارتلاييش بيلميرم نه دير،
دالينجا گليره‌م يا رَسُول الله!
بيليگين سيرري‌سن، علمين شهري‌سن،
غئيبين اؤرتۆگۆسن، شعرين نهري‌سن.
بشر معجزه‌سي، اعجاز بحري‌سن،
دالينجا گليره‌م يا رَسُول الله!
دئدين: «ايها الناس! بير اولون هامي،
عرب، تۆرك، هيند، عجم يانديرين شامي.
قاتين بير - بيرينه بۆتۆن ايّامي.»
دالينجا گليره‌م يا رَسُول الله!
«دوسدوغرو يول توتوب قاباغا گئدين،
فضيلت پايلايين، ياخشيليق ائدين،
ياشاييش اساسي اخلاقدير» دئدين،
دالينجا گليره‌م يا رَسُول الله!
گۆلۆشلر گۆللندي گؤزه‌ل اۆزۆنده،
حكمتلر قاينادي يئتگين سؤزۆنده.
اؤزتلندي خلقت سنين اؤزۆنده،
دالينجا گليره‌م يا رَسُول الله!
مدحيه يازماقدان چكيندي دۆزگۆن،
سنه عاشيق اولوبدور ايندي دۆزگۆن.
تركينه دۆلدۆلۆن مينمكده دۆزگۆن،
دالينجا گليره‌م يا رَسُول الله!
تبريز يوللاريندا - ص 7- 2 ربيع الاول 1401 هـ . .
