تبريزده قورولان «نظامي» قورولتاييندا
چيخيشمي لغو ائده‌ن قارداشلارا هديه دير.
قويماييرلار بوردا چيخيش ائده م من،
گؤرۆرسن هر ايكي گؤزۆنله تبريز.
دئييرلر «مصلحت دگيل، دانيشما،
ائوميزي ييخارسان سؤزۆنله!»، تبريز.
علسگر، دئييرلر امر وئرميشدي،
چيخيشيمي منيم لغو ائيله‌سينلر.
سالون ايچره منه يول‌دا وئرمه‌ييب،
خلقه «خسته لنيب اوستاد!» دئسينلر.
اينانمازسان منيم سوسماغيما سن،
سني دانانلارين اويموشام گؤزۆن.
اوغلون چيخيشيله اوغلون ديليله،
دۆنياني بۆرۆيۆب حكمتلي سؤزۆن.
سويونو ظن ائده‌ن يۆكسك نژاددان،
بيرگۆن نظامي يه «دانيشما!» دئميش.
«منيم اؤز ديليمده دانيشمالي سان،
اؤلدۆررم باشقا جۆر دئسن!» سؤيله‌ميش.
شاها او دئميشدير: «باخ! نظامي‌ني
خطادير، خطادير، خطا! اؤلدۆرمك!»
منيم نظاميله، بونون شاه ايله،
نه فرقيميز واردير، بوگۆن دۀ گؤره ك؟
قوي دئييم ايذين وئر بوگۆن اوجادان،
بو نادانا خيطاب اۆره‌ك سؤزۆمۆ.
دئييم: «آرشينينا سيغمارام سنين،
ساتمارام ناكسه سن تك، اؤزۆمۆ .
تبريزين ايچينده شاه پرستلره،
تريبون وئريسن، سؤز آييريرسان.
گئري قالميش هر بير عاليم نۆمايا،
امكانلار ياراديب ائو قاييريرسان.
انقلاب يارادان بير شاعيرم من،
سن تكين ناداندان ائتمرم تمكين.
دين اؤرتۆگۆ آلتدا گيزلتمه اؤزۆن،
باشقا بير شئ سن سن، بامباشقادير دين.»
تبريز! بو نادانا سؤيله كي: «دۆزگۆن،
جانلي نظامي‌سي اولموش بو عصرين،
اونون چيخيشيندان نه‌دن قورخورسان؟
داغيتميش سؤزيله استبداد قصرين!»
تبريز يوللاريندا - ص 18.
