سنمي سؤزلريمه «مبتذل» دئدين؟
معناسين بيلئيدين كاش مبتذلين!
ادب‌سيز اركان‌سيز اۆزۆمه دوردون،
پول ايله آلدينمي اونون بدلين؟
آتيليب دۆشدۆلر سندن قاباق چوخ،
سايماديم هئچ، آنجاق گؤيلۆم بولاندي.
دؤزۆملۆ گۆنۆم وار هر گلن ظۆلمه،
دئسه‌لر سارسيلديم، بيل كي يالاندي.
سوسدورا بيلمه‌دي جلاّدلار مني،
سن كيم سن؟ آتديغين نه دير او پالچيق؟
گۆلـله‌لر قلبيمي دئشه بيلمه‌دي،
سؤزۆنمۆ دئشه‌جك هپ قيريق - قيريق؟
آدام اوستادينا عاق اولماز بالا،
حؤرمت ساخلاماغين اوستادين اؤيره ن!
ائلينه عاق اولان ناخلف‌لرين،
اۆزۆنه تۆپۆره‌ر قهرمان وطن.
سني، باخ! اۆستۆمه قودوردان ناكس،
دؤزۆمۆمدن منيم باسغين يئميشدير.
ادراك ائتمه‌ميشدير ملّي دويغونو،
اودور كي مبتذل غزل دئميشدير.
او نه قانير ناموس نه دير، ائل نه دير؟
هر كيم مينيك وئرير، پالانا دؤنۆر.
ايماني يالاندير، ميثاقي يالان،
دۆنن دانديغيله بوگۆن اؤيۆنۆر.
اليندن دۆنياسين آلسان ناكسين،
آخرتي دانار، وجداني دانار.
معنويّتي يوخ، فضيلتي يوخ،
اۆره‌گي پول تكي چؤرتگه ده سانار.
انسان ديني ايله «ميثاق» باغلايار،
ائليله، يورديله، ديليله، نادان!
كت - شالوار قصدينه ميثاق نه گره‌ك؟
قبا آلتينا گل گيرمكدن اوتان.
تبريز يوللاريندا - ص 21 - فروردين 1380.
