منبع: وبلاگ يوردوموز يوواميز
عاشورا گئجه‌لري تبريزده شمع پايلاما مراسيمي مناسيبتيله
«گولو - گولزار رسالت بو گئجه،
شيمردن ايسته‌دي مهلت بو گئجه!»
اذانين آخدي صداسي جانيما،
بو گئجه ايسته‌مه حاشا ائليه‌م.
گئديرم آي باجي قيرخ بير مسجيده.
آنامين نذريني برپا ائليه‌م.
باش وئريبدير نه قيامت بو گئجه!
قوي گئديم بيرده قيزيللي مسجيده،
ساوموشام سورخابي، سئيتمزه‌ني من.
مقبره مسجيدي‌نين آغزيندا،
آغلاماق باسدي باجي، لاپ بيردن!
گلدي اخلاص ايله حالت بو گئجه.
كربلانين كيتابين، قان ايچره،
آچدي نوراني بابام قارشيمدا،
قاينادي منده ده مظلوم داماريم،
نه هوالار وار ايميش باشيمدا؟
بورودو جانيمي غئيرت بو گئجه!
دايي‌مين زنجيري‌نين دويدو سسين،
قارا كؤينكلي گليب قارشيلادي.
مني اؤز اصليمه قايتار، باجي جان!
دئينه: «دوزگوندو بونون اصل آدي!»
قلبيمي ائيله ضمانت بو گئجه.
تبريز يوللاريندا - ص 12 - عاشورا گئجه‌سي 1368.
