خئيرخواهليغي گل تعريف ائيله‌يك،
هامي «خئيرخواهيق» دئييرلر، تبريز!
حتي دۆشمنلرده سنين قارشيندا،
دئييرلر «خئيريوي ايسته‌ييريك بيز!»
گؤزلۆگۆنه هر كيم بير بويا ياخميش،
باخير انسانليغا، باخير دۆنيايا.
هره بير بويادا گؤرۆر جهاني،
بويا هارا امّا تبريز، سن هارا؟
بؤيۆتدۆن اوغلونو رنگ‌سيز، بويا‌سيز،
قلبيمين صافليغي يوخ دئميش رنگه،
تۆركه
سايايام من، باشقا سايام يوخ،
بويانارام يوخسا رنگه، نيرنگه!
خئيرخواهليقلاردا تعريف اولاندا،
هره‌سي داشييير بير رنگ، بير بويا.
بو خئيرين، او خئيرين دئينلر نه‌دن؟
ذره‌جه بير سني گلميرلر سايا؟
سنه خئير بير گۆن دۆشۆنن ناكس،
واختيندا اليندن توقات يئميشدير.
باشقاسي‌‌دا اؤزۆن يورماسين عبث،
اوتوروب داليندا هر سؤز دئميشدير.
گويا تبريزده داي كيشي قالماييب،
مثلا شهريميز قَحطٌ الرّجال دير!
ناكيشيلر بيزه خئير آختاريرلار!
آنا تبريز قالخ باخ، گؤر بير نه حالدير!
دۆنن شاهنشاها ظِلُ الله دئيه‌ن،
سنه بوگۆن گليب «دوستونام» دئيير.
دئمك نه لازم؟ سن اؤزۆن بيليرسن:
يئني دونا گيرميش، يالان سؤيله‌يير.
بشريت خئيري سنده‌دير، تبريز!
سن ياخشي بيليرسن خئيرين تاريخين.
سندن اؤيرنسينلر خئيرخواهليغي،
خئيرخواه انساني بۆتۆن هر يئرين.
تبريز يوللاريندا - ص 66 .
