سون نفسده
من ياشدا اولانين گؤزۆ يولدادير
قولاغي سسده،
سانكي دايانميشدير
آرخادا اوزانان
شرفلي، شوكتلي،
اوزون كئچميشي
اوزاقلاردان گلن خيشيلتيلارا
بشارت شافاغين تؤكن سحره -
باغلايا، اؤله...
من ياشدا اولانين گؤزۆ يولدادير،
قولاغي سسده،
شاه بابامين بيرده
«مولا يا علي» سسيني دويا!
جنوبدان شيمالا
گؤيلرده اوچان وئرتاليوت گؤره،
اوچاقلار سئير ائده،
عصمتلي - ناموسلو آنا - باجيمي
داشناكين جينايت جايناقلاريندان
قورتارا، اؤله،
بو سون نفسده.
من ياشدا اولانين گؤزۆ يودادير،
قولاغي سسده،
يئني بير قيليقدا «ساهر»ي تاپسين.
اونون ديره‌نيشين، مقاومتين،
ساهرانه جنگي
اۆره‌گيندن سيزان زۆلال آهنگي،
صۆبحۆن هاواسيندا، سو پرده‌سينده،
آغير - آغير اوچان قوشلار سسينده،
ائشيده، اؤله
بو سون نفسده.
آرزوسوز - دؤيۆشسۆز قارغا دگيلم
هر دونا گيرسم‌ده
يئنه قارتالام.
سني ده قارتال تك گؤرمك ايستيرم
بو سون نفسده.
آمان، آمان! منيم خورما تئل اوغلوم!
كوت - شالوارا، پولا الله سؤيله‌ين،
ديني اگلنجه ائده‌ن،
ائله دؤنۆك چيخان،
امانت تانيماز، صداقت بيلمز،
آديني دا قويان «امين! صداقت!»
حياسيزجاسينا قارشيما چيخير
اۆزۆمدن اوتانمير
منّتدار اۆزۆ.
اۆلكره خور باخير،
ايكي هيز گؤزۆ.
من ياشدا اولانين گؤزۆ يولدادير
قولاغي سسده،
اونودا دينله‌يه
بو سون نفسده.
تبريز يوللاريندا - ص 57.
