سن اي داغ!
سهند، اي يۆز مين ايللر قبله‌گاهي، اي
اولو معبد!
سينه‌نده لاله‌لر بيتميش،
سولار آخميش، سئل آتلانميش،
بوروقلاريندا آهولار جيلولانميش،
بير چوخو ايتميش.
آنالار ياسا باتميش، درده قانلانميش،
چادرلار، ائولر اودلانميش.
يادا سال، گل!
سهنديم،
اي اولو معبد!
فضوليني گؤرۆبسن سن،
دده‌م قورقود اؤتۆب سندن،
و هم زردوشت پيغمبر،
نباتي‌ني يادا سال گل!
سهنديم!
اي اولو معبد،
قارانليقلاردا آتلانماغي گؤرمۆش‌سن،
آنالار قلبي ايچره داغي گؤرمۆش‌سن.
شهيدلر قاني آخميش دامنيندن هر گئجه گۆندۆز،
نه‌لر سن گؤرمۆسن داغيم،
نه‌لر،
بير يادا سال،
گل باخ!
سينه‌ن حكمت بولاغي،
تجربه قايناغي،
تاريخين دياري،
يوردومون دفتر كيتابي!
يادا سال، گل!
سهنديم،
اي اولو معبد!
ائلين تاريخيني دانماق،
نه پيس ايشدير!
كيشي‌ديرمي ائلين چاكر ائده‌ن هر ناخلف؟
نه دؤوراندير كي يالتاقلار سنين سينه‌نده آت چاپسين؟
سهند، اي يۆزمين ايللر قبله‌گاهي!
سؤيله تاريخه،
شهادت وئر كي: «پيس ايشدير،
ائلين هر ناكسه چاكر نؤكر سانماق.»
يادا سال گل، خلف اولادي،
هم ده ناخلف قارنين قاداسين،
يادا سال گل!
باشيوين يۆزلر بلاسين.
بوگۆن سينه‌نده اوتلاقلار،
سۆرۆ سئيرانگاهي اولموش.
چوبانلار ني چالير بوردا.
سرين يايلاقلاريوا ائل اوبا دولموش،
جوانين يورد سالير بوردا،
قوجان‌دا ذؤوق آلير هر دم.
نه‌دير غصه، نه‌دير غم، هئچده من بيلمم،
ائلين قوربانليغي سايسيز حسابسيز دير سنه.
قبول ائيله بو شن گۆنده،
كئچن گونلريني،
بير – بير،
يادا سال، گل!
سهنديم،
اي اولو معبد!
اوزاقدان بير چوبان سسلير مني ده،
دئيير:
شاعير!
بو يوردون قهرماني، سؤز بيلن انساني واردير، بيل!
وطن خالي دگيل اصلا،
خلف اولادي دۆزگۆندن.
تبريز يوللاريندا – ص41 – 1380.
