تبريز سؤزۆ قولاغيما ده‌گنده،
جانلانير گؤزۆمده معلم‌لريم.
«حكمت مدرسه‌سي»، «لقمان»، «فيوضات»،
«دانشسرا» گلير خيال ائوينه.
منه غرور وئرير بو آد، بو حيات،
اؤزۆمۆ تبريزلي كيمي گؤره‌نده.
كيتابخانا‌سيندا «تربيت»ين من،
گؤرۆره‌م اوتوروب «امير شقاقي».
اونلا اوخوياركن «گلشن راز»ي،
اؤتۆرم كئچيرم بۆتۆن آفاقي.
منه اوخوتدوران «عقد الفريد»ي،
بورادا اؤيره‌دن «برهاني» هاني؟
معناسي تبريزين «مشكوة» ديرمنه،
اوخويوب سئوديگيم «معراجنامه» دير.
گؤزلريم اؤنۆنده او مرد كامل،
«آقا ميرزا عمران»، «شرح لمعه»سي،
«منطق كبري»سي، بيرده «عوامل».
بيرده اۆزدن ايراق، ائليني دانان،
چؤره‌ك - چيراق اۆچۆن بعضي آلدانان.
عاليم نومالارا، نئجه دئييم من:
معليم!
بيليرم،
اذن وئرمزسن،
سن، آنا تبريز!
تبريز دانشگاهي هله‌ده سنين،
خور باخير ديلينه، اولماز آناجان!
«فضولي»سيز «نسيمي»سيز ياشاماز،
«معجز» سۆز اولانماز كي آذربايجان.
هاني «نباتي»نين «راجي»نين آدي،
«يوسف خاص حاجيب» ين اولو فريادي؟
باشيم قالا دۆشدۆ دانشگاهيندا،
كاشكي گئتمز ايديم هئچده اورا من،
تئوريزه ائتدي علمين آديله،
بير سيرا يالاني، فيريلداقلاري،
درديمي آپاريم بوردان هارا من؟
سنله دانيشماق چين سؤزۆم چوخدور چوخ،
شيكايتيم وار بعضي معليم‌لردن،
طالعيمدن اصلا كۆسگۆن دگيلم،
سنه دؤنه‌جگم بيليرم وطن!
اؤزۆمۆ تبريزلي حسّ ائيله‌ينده،
منه غرور وئرير بو آد، بو حيات...
تبريز يوللاريندا - ص 25- 1356.
