چايين زۆلال سويو سانكي، بير گؤزه‌لين گؤزلري،
شيرهاشيرلا آخيشيردي ائنلي چايلاق ايچيله.
قيراغيندا قالخان لاله، جور به جوره چيچك‌لر.
موج قالديريب تاتلي بوسه وئريرديلر بير – بيره.
دورو گؤيۆن اۆزه‌رينده پارلاييردي آل گۆنش،
سۆزۆشۆردۆ بير نئچه ده آغجا بولوت يان – يانا.
گؤستريردي بير دوروگؤل ماوي گؤيۆن مۆلكۆنۆ،
سلطه تاپميش قيزيل گۆنش بئله گؤمگؤي آسمانا.
گؤل ديبينده چيلپاق، ظريف يوسما تنلي گؤزه‌للر،
ياتميشديلار آل گۆنشين ساچاغي‌نين آلتيندا.
چيمن زامان تنلرينده گۆلۆن دوران شافاغي،
داملاييردي گؤي چيمنين اۆزه‌رينه دايقادا.
اوتايلاردا چيچك‌لرين آراسيندا سۆزۆردۆ،
تره ييغان رنگلي لچك نئچه كندلي گؤزه‌ل قيز.
ايچلرينده گؤزۆم دۆشدۆ بير آل لچك دلبره،
آسمانيمدا آنجاق بيردم پارلادي او شن اولدوز.
عاشيق اولدوم سۆزۆشۆنه چيچك‌لرين ايچينده،
بۆرۆمۆشدۆ دئوره‌‌سيني رنگلي لچك گؤزه‌للر.
حئيران - حئيران سۆزدۆم اونو گؤزلريمله خئيلي
واخت،
آنجاق بيلمه‌م نه اولدوكي بيردن ايتدي او دلبر.
كيپريك چالديم يايينديمي آل لچك قيز گؤزۆمدن؟
يوخسا قالميش جانلانميش بير چيچگي ايدي دۆزلرين؟
يئر اۆزۆنه گلميشدي او گزيشمگه بير مدت،
يئنه اولدو يول چيچگي، آخيب تاپدي اؤز يئرين؟...
كيچيك
شعرلر - ص 145 – 1347.
