واردير سنه احتياجيم چوخ آغير،
قويما بوردا غملي قاليم، آي گؤزه‌ل!
اگر مني ايسته‌ييرسن، سئويرسن،
گل يانيما سني آليم، آي گؤزه‌ل!
خوشالام كي دۆشمنيوي ازميشم،
ساچلارينا يوخودا گۆل دۆزمۆشم.
سندن اؤترۆ داغ دره‌لر گزميشم،
دؤن باخ منه شوخ ماراليم، آي گؤزه‌ل!
سني مندن هئچ بير قوّه آلانماز،
آذربايجان دۆشمنلارا تالانماز.
آغير گۆنلر چوخ سۆرمز چوخ قالانماز،
گل يانيما دؤنسۆن حاليم آي گؤزه‌ل!
من دئميرم، سن اؤزۆن باخ، گلسن، گل،
گؤزلرينه نه سۆرمه ياخ، گلسن، گل!
دؤشۆن اۆسته نه ده گۆل تاخ، گلسن گل،
بيرجه سنسيز يوخ قراليم، آي گؤزه‌ل!
كيچيك شعرلر - ياي 1348 اورميه - ص 147 .
