اي ائلين آرزوسو، ديله‌گي، سؤزۆ!
اي ياتان خالقيمين، او آييق گؤزۆ!
اي شن مجليسلرين، دادي، هم دوزو،
اي گؤزه‌ل انسانيم، اونوتمام سني!
اي باهارين ـ يازين گۆلۆ، بۆلبۆلۆ،
فعله‌نين كندلي‌نين بوغدا، سۆنبۆلۆ،
اي تامام يوللاري انقلاب يولو،
ايگيد قهرمانيم، اونوتمام سني!
اي وطن اوغروندا چاليشان اوغول،
اي اۆره‌كدن يانا، آليشان اوغول،
اي وقارلي آتا، عالي‌شأ‌ن اوغول،
عزيز مهربانيم، اونوتمام سني!
اي ائلين شوكتين اوجالدان اوستاد،
اي اؤزۆن بو يولدا قوجالدان اوستاد،
فايدالانان، آن دان- ماجالدان
اوستاد،
خوجام، قوجامانيم، اونوتمام سني!
اي اومودسوزلاري وجده يئتيره‌ن،
اي «دۆزگۆن» دانيشان دۆز يولا گيره‌ن،
اي «آسلان»ي داغدان شهره گتيره‌ن،
اي ديليم، ديلمانيم، اونوتمام سني!
عبدالعلي مجازي
