حسين شهرك
عنوانلار ايچينده، يوللار ايچينده،
استاد اينجه صنعت ميدانين سئچيب.
باشقالار ترپشيب، اؤلچۆب، بيچينجه،
كسكين قلميله او ووروپ كئچيب.
***
خلقين فولكولورون ديلين قورويان،
اوردونون كروانين سركرده‌سيدير.
اوندا يورولماغين معناسي يوخدور،
سارسيلمايان اونون ايراده‌سيدير.
***
صديق بير تشكيلات، او بير حزبيدير،
دۆزگۆن بير مكتب‌دي، او بير ملت‌دير.
اؤزۆنده وزيري، مشاوري‌ده،
صديق بير دۆنيادير، او بير دؤولتدير.
***
عاليم فيلسوف‌دير زمانه‌ميزده،
او بير فرهنگستان، او بير دانشگاه،
مين‌لر اؤزۆنه تاي طلبه‌سي وار.
او بير علامه‌دير هر شئيه آگاه،
***
اليندن قورتولماز بير اۆچۆب قاچان.
او بير شكارچي‌د‌ير مهارت كاني،
سودا قورولوقدا مشكلي آچار.
صديق تسخير ائده‌ر زمان ـ مكاني.
***
او سئل‌لره دۆشۆب، بورانلار سوووب،
درين دريالارين اۆزگۆنچۆسۆدۆر.
طوفانلار گئچيرديب، قار ـ قيرو
گؤرۆب،
آغيرسيناقلارين بيرينجي‌سيدير.
***
وجودو تلاشدير، سعي‌دير، اونون،
نه گئجه‌سي واردير نه گۆندۆزۆ وار.
اونون هر سلولي حسين صديقدي،
هر گۆنده ساعات دا اونون ايزي وار.
***
چوخلار دليك دئشيك آختاران زامان،
صديق متانتله امكان ياراديب.
دۆزگۆن فرصتلري ايجاد ائيله‌ييب،
اونداكي ناققالار مين‌لرين اودوب.
***
ملّي حق حقوقو مدافعه‌ده،
مطلق آيري نفر اونا چاتانماز.
هميشه اؤنده‌دير صديق معلم،
هئچ آتلي آتيني اونلا چاپانماز.
***
فصاحت، بلاغت ميدانلاريندا،
بؤيۆك سخن‌راندي، بؤيۆك خطيب‌دير.
قلمين گؤتۆرۆب كلاسا گيرسه،
ميثيل‌سيز، معلم بؤيۆك اديب‌دير.
***
صديق بير عمّان‌در، او بير دريادي،
دريالار ايچينده او بير نهنگ‌دي.
آذربايجان بويدا صديقين آدي،
او شيردي، جنگل‌دي، او بير پلنگ‌دي.
***
تپه‌دن ديرناغا استعداددير او،
اونون شمّي قوي، احساسي درين.
سهل و ممتنع دير صديق مكتبي،
دۆشۆنن‌لر دئيير مين‌لر آفرين.
***
دقت ائتمه‌لي‌ييك، درس آلماليييق،
او مردمي‌ليگين پهلوانيدير.
ليك تقليد ائتمك اونو چتيندير،
صحنه‌نين يگانه قهرمانيدير.
***
مدني، علني شيوه‌سي واردير،
بيلر هانسي اؤلكه مملكتده‌دير.
صديق چوخ پخته‌دير، كاركشته‌دير،
بيلر هانسي شه‌هر هانسي كنده‌دير.
***
دۆشۆنر نه يئرده ا‌ولدوغون ايشين،
هر سؤزۆ هركسه دئمك دۆز ده‌گيل.
بيلر خطابه‌نين گيريش ـ چيخيشين،
يئرينده اولماسا بير سؤز، سؤز ده‌گيل.
***
سحر جادو ائده‌ر افسون ائيله‌ير،
كلمه‌لر، مفهولار اونون ديلينده.
واژه ياريسيندا كلامي كيمي،
تاپار اؤز مكانين صديق الينده.
***
او بير نابغه‌دير، او بير حكيم‌دير،
تاپيلماز صديقه يئر اۆزۆنده تاي.
اونون پيرولري امتي واردير،
پيغمبرلر ايچره صديقي‌ده ساي.
***
آگاه‌دي مذهبه، دينه، فرهنگه،
ياشاييب اسلامي، مسلمانليغي.
بۆتۆن دۆشۆنجه‌لر اونا محترم،
باش سايير هر نه‌دن او انسانليغي.
***
بيلر آدابيني، رسملريني،
صديق مسجدين‌ده، ميخانه‌نين‌ده،
ديلين باشا دۆشر درديني قانار،
صديق عاقيلين‌ده ديوانه‌نين‌ده.
***
تزوير ريا ده‌گيل، بو باجاريقدي،
حيله كلك ده‌گيل، بو درايتدي.
فرصت‌طلب‌ليك يوخ، نكته‌سنجليك،
اۆشۆنمك قورخو يوخ، بو شجاعتدي.
***
هر اويونون تكي پاتكي واردير،
دؤيۆشمده، غلبه شكست‌ده اولار.
هاي‌كوي‌ده شعاردا شعورلا گره‌ك،
حركتده يوروش، نشست‌ده اولار.
***
صديق نسيمي‌دير، عمر خيام‌دي،
حكيم‌دير، فضولي، نباتي كيمي.
اونلاري ياشادييب اثرلرينده،
اينجه مهارتله حياتي كيمي.
***
حيات يوللاريندا مبارزه‌ده،
ائنيش وار، يوخوش وار، اؤلۆم ديريم
وار،
آل ـ وئر دۆنياسيدير بيزيم دۆنياميز،
اوردا «نه‌لر، آليم نه‌لر، وئريم»
وار.
***
اوچروملو يوللاردا يول گئدن كيمسه،
فرز اولسون گره‌كدي، چوخ اوياق اولسون،
ايشله‌يه‌نين الي آياغي باتار،
آنجاق آنلي آچيق اۆزۆ آغ اولسون.
***
مبارز اؤز سهوي غروري ايله،
زورلويا بهانه وئرمه‌مليدي.
جانا آلمامالي تهلكه‌لري،
تدبيرسيز ايشلري گؤرمه‌مليدي.
***
دئميرم معصوم‌دي، اشتباه‌سيزدي،
سؤزسۆز حركتين سهوي‌ده اولار.
يول گئدن بو دره‌ير ييخيلار دورار،
اشتباه ائيله‌مز يالنيز اؤلۆلر.
***
صديق بير لشكردير تجهيز ات
ايله،
او هم فرمانده‌دي، همده سربازدي،
نقشه‌سي، تاكتيكي، توپو، تانكي وار،
صديق بير سرداردير، ائله
جانبازدير.
***
سنگري بوشلامير، رزمي ترك ائتمير،
رقيبين جنگي وار، بد آهنگي وار،
بن‌بسته يول تاپيب دۆگۆن آچماغا،
صديقين مين فني، مين ترفندي
وار.
***
صديق فرصتلري الدن اؤتۆرمۆر،
هجوما كئچه‌جك يئري گلنده.
محكم‌لنديره‌جك موقعيتي،
روزگار، شرايط مهلت وئرنده.
***
بيرلحظه مرامين خلقين اونودمور،
اونون قلمي‌نين نيشي ـ نوشو وار.
گؤيده لحظه‌لري، آنلاري دوتور،
اونون نئچه نئچه سردار قوشو وار.
***
تغيير، تكامله باوري واردير،
كرداردا، گفتارادا گؤستريب بونو،
دؤگم‌ليك، تحجّر اوزاقدير اوندان،
كهنه‌ليك‌لر بنده چكنمز اونو.
***
ائلي‌نين اوغلودور، قهرمانيدير،
او ياخشي تانييير زمان مكاني،
هوشو وار، باشي وار، اشتباهي آز،
يئرينده خشله‌يير هر بير امكاني.
***
گۆنۆن ايشيغيندا يول ناذهن اولسا،
او گۆندۆز گيرله‌نيب، گئجه يول
سۆرۆب،
تاپلاشيب شاختايا، بورانا، قارا،
يازين گلمه‌سينه تدارك گؤرۆب.
***
مشكلات اؤنۆنده فيرتانالاردا،
اونون اؤز اينامي، عقيده‌سي وار،
اؤزۆنه مخصوص دور قورتولوش يولو،
صديقين باخيشي، اؤز ايده‌سي
وار.
***
دئييرلر توچالين بير قلّه‌سي وار،
لاكن الليدن چوخ اونون يولو وار،
بير يول باغلي اولسادا داغچي دايانماز،
داغين او اۆزۆ وار، ساغي سولو وار.
***
او ياخشي يولداشدي، يولداشا سيرداش،
وظيفه داشيار قرارا گله‌ر،
دۆزگۆن نقشه چكه‌ر، دۆزگۆن يئرييه‌ر،
يئرينده لاپ ياخشي سياست بيلر.
***
اونو دۆشۆنمه‌دي قيسا فيكرلر،
بيري قورخور دئدي بيري خور باخدي،
اولار اؤزلرينه هر نه دئديلر،
صديقين چشمه‌سي آخدي گور آخدي.
***
يوللاردا غيبته، تؤهمته قاليب،
اونون خدمتلري سايا گله‌مه‌ين،
بعضا ياخشي‌سينا پيس جواب آليب،
كوردو خدمتلرين گؤرۆب بيلمه‌ين.
***
مثل‌دير چوخ يئمك قويار بشري،
معمولي ياشاماق آز يئمك‌ليكدن،
يئرسيز دانيشيقلار محروم ائيله‌ير،
انساني يئرينده حق دئمك‌ليكدن.
***
صديق بير معتقد مؤمن‌دي منجه،
او بير دِمكرات منطقي انسان،
صديقين اؤز ديني، اؤز تانريسي
وار،
لذت آپارارسان اونا اينانسان.
***
صديق معتدل‌دي ياشاييشيندا،
بيلر جامعه ده خط قرمز وار،
او، اؤزۆ ايراقدير افراط تفريطدن،
بيلر سرعت‌گير وار بيلر ترمز وار.
***
آتميش يئتميش نه‌دير آي قوجا
قارتال،
يۆزلري وور باشا صديق معلم!
عؤمرۆن اوزون اولسون بهره‌لي اولسون،
مين ياشا، مين ياشا صديق معلم!
