تبريزين اركي‌نين
آياغي آلتيندا،
اردبيلدن
گلن گؤزه‌ل بير جوان،
سريلدي يئره.
ايكي آغ گؤيرچين،
باشي اۆستۆنده،
قوپدو اركين سؤكۆك - تؤكۆك بؤيرۆنه.
بيري دئدي:
- باجي!
باشقاسي سؤيله‌دي:
- باجي! جان باجي!
سؤيله سؤزۆن باجي، باشيمين تاجي!
- بيليرسن اركيمين،
قوجا اركيمين،
آياغي آلتيندا ييخيلان كيمدير؟
تورپاقلار اۆزه‌ره سريلن جوان،
بو ايگيد اوغلان؟
- يوخ، بونو بيلميرم!
كيمدير، سن سؤيله!
- اردبيلدن
گلميش عاشيق ايگيددير.
يارالانميش قلبي، مجروح سينه‌‌سي،
كسيلميش نفسي، باتميشدير سسي!
درماني تاپيلمير، درمانسيز قالميش!
- قاناديمدان ايندي بير پر سالارام،
كاشكي اوغلان اونو گؤتۆره بيلسين،
ايشيقلي دۆنيايا اۆزۆنۆ توتسون،
نفسين گۆنشه يئتيره بيلسين،
سينه‌‌سي‌نين قانين پريمله سيلسين ...
اردبيل
لوحه‌لري - ص 17- 1379.
