سن آذربايجان‌سان
دۆشمنه بير پارچا اودسان
منيم قلبيمده وولكان سان
اليمده مشعليم، نوروم،
آدين معنا وئرير ميليونلار انسانا.
شفقلر، كسرويلر،
رعديلر، يحيي ذۆكالار
سۆمسۆنن كارنگلر وارسا،
سنين ميليونلار اوغروندا عزيز جانين قويان واردير،
اوجا داغلاردا آصلان تك
خبيث گؤزلر اويان واردير.
سايين‌دا
آدديم - آدديم عزّي فرّين ساخلايان واردير،
سايان واردير.
سؤزۆم قورتارماميش حالا
بابام سلطان صفي‌الدين
ياتيبدير اربيلده گؤزله‌يير اوغلو قيام ائتيسن،
سنين اوغروندا جان وئرسين،
سووارسين ريشه‌وي قانيله،
قان وئرسين.
سنه كؤكدۆر تملدير اردبيل،
تبريز!
سن آذربايجان‌سان،
دۆشمنه بير پارچا اودسان!
الين آت ريشه‌وه
آت اردبيله
شاه ختايي‌نين
قيلينجين آل اله
دوغراگيلن سن ناخلف ائولاديوي، تبريز!
دؤنۆك چيخدي سنين احفاديوا
كتدي دئدي، مشدي دئدي،
گؤيدن دوروب باخدي بيزه.
آللاهادا عصيان ائديب، دين گتدي
قول چكدي بۆتۆن آلچاقليغا، تبريز!
ديلين داندي، ائلين داندي،
اؤزۆن همده پئيمبر ساندي اول آزغين!
ايراق اولسون قيزيل باشلار گؤزۆندن.
سيل
اۆزۆندن لكه‌ني
تبريز!
سن آذربايجان‌سان،
بير مقدس مقبره‌ن واردير -
مقدس شهريميزده، اردبيلده،
بابام سلطان صفي الدين ياتيبدير!
گؤزله‌يير اوغلو قيام ائتسين ...
اردبيل
لوحه‌لري - 1347 - ص 26.
