اولو آتا - بابالارين باشلارينا نه‌لر گلميش،
كيملر وارميش، كيملر يوخموش، كيملر قالميش، كيملر
اؤلمۆش؟
دره‌لردن تپه‌لردن چايلار، سئللر نئجه آخميش؟
اسكي انسان طبيعته، ياشاييشا نئجه باخيميش؟
گلن باهار، اؤتن پاييز نه ارمغان گتيرميشدير،
گئچن زمان انسان بوردا نئجه عؤمۆر بيتيرميشدير؟
ياشاييشين گره‌گيدير تانيماق كئچميشي بيزه،
تازا نسيل باخا گره‌ك اولو بابا گئده‌ن ايزه.
كئچميش اؤتمۆش حادثه‌لر، گله‌جگه بير عيبرتدير،
انسان اؤلر گئده‌ر، آنجاق هۆندۆر قالان لياقتدير!
اعتناسيز باش آشاغي ساليب بوردا زمان، زمان،
خبرسيز هر اولاييشدان دولانما اي مغرور انسان!
بو دۆزلره چوخ داهيلر سندن قاباق باسيب آياق،
بو داغلارين اؤنلرينده قايناييبدير مين جۆر
بولاق.
سندن قاباق چوخ سۆرۆنۆب بوردا چايلار داغ آشاغي،
خيلي واخلار دومان دوتوب يئري، گؤيۆ، داغي، داشي.
ميليونلار ايل بوندان قاباق، طبعتين سون نغمه‌سي،
انسان اوغلو، يارانيبان سالدي يئره، گؤيه سسي.
بيتمز زمانلار دولاندي مكانلاردا چئوريلمه‌دي،
اسگي انسان گلميش يئرين تانيمادي هئچ بيلمه‌دي.
گاه دئدي كي گؤيده، آخان او آي مني ياراديبيدير.
گاه يارادان اۆچۆن گليب مس قيزيلدان هيكل قوردو،
گاه ياپديغي داش اؤنۆنده باشين اگيب، بوينون
بوردو.
انسان عاغلين ايشه ساليب مينلر تانري ياراتديسا،
تانريلارسا آشلارينا سويوق – سويوق سو قاتديسا،
ظۆلمت چؤكۆب انسانليغين يوواسيني بۆرۆدۆسه،
مخلوق تانري، خاليقلري تورپاق اۆسته سۆرۆدۆسه،
يئنه زمان چئوريلمه‌دن، يورولمادان، هئي دولاندي،
آي كئچديكجه، ايل اؤتدۆكجه،
آج تانريلار بير - بير اۆسته چوخ قالاندي.
انسان دۆشدۆ تانريلارين جنتينه يانا - يانا.
ياراتديغي دستانلاري آجي ناغيل اولدو اونا.
بعضن انسان ترپنره‌ك بويلانيردي ظۆلمتلرده،
اونون كسگين چاغريشيله يازيليردي مينلر پرده.
چاغيريردي انسانلاري قارداشليغا، محبّته،
او سون قويماق ايسته‌ييردي آلدانيشا، شقاوته.
حق يولوندا مبارزه وورغونلاري
سارسليمادان،
تيكانلارا، اوچروملارا، مانعلره هئچ باخمادان،
ياشاييشين دئولريله ووروشماغا باشلاييردي،
عفريتلري، پادشاهلاري، اوخلاييردي، داشلاييردي.
يۆكسلديردي ماوي گؤيه الينده‌كي مشعل‌لري،
باخمادان كي كسيله‌جك ظۆلمت اليله اللري.
بو انسانليق عالمي‌نين بزه‌كلري اولانلاردان،
گله‌جگه قاليب خيلي عظمتلي شانلي داستان.
كئچميش اؤتمۆش حادثه‌لر گله‌جگه بير عيبرتدير،
سن اؤلرسن بوردا آنجاق هۆندۆر قالان لياقتدير.
اوچغون داخما - ص23 - 12 / 1 / 46 - تبريز.
