سلام قهرمان اي كؤنۆل مۆلكۆمۆن شاهي،
ياشايان قالان هر زامان بو ملتله.
بشريّتين شاني شؤوكتي جاهي،
قوجا تاريخين يۆكسك صفحه‌لرينه،
قيزيل ايز سالان اؤلمز نابغه، داهي.
سلام قهرمان ايگيت اوغلو آنامين،
كور اوغلو دؤلۆ باشچي‌‌سي دلي‌لرين،
ايشيق يوللاردان اي آلان اؤز ايلهامين،
گله‌‌‌جك نسيل داهادا آنار سني،
قاليب، قالاجاق تاريخده يۆكسك آدين.
سلام قهرمان ديله‌گيمين چيچگي،
قارا ظۆلمتين سارسيلماز دؤگوشچۆسۆ،
ائلين اويماغين أسگي آرزو - ايسته‌گي،
سيلينمز اصلا اۆره‌گيمدن تصويرين،
اي انسانليغين، ياشاييشين بزه‌گي.
سلام قهرمان محبتين چيراغي،
نئجه سؤندۆره‌ر كيمسه سن تكي شامي؟
يانارسان داييم نورلادارسان اويماغي.
حله پارلاييب يۆكسه‌له‌‌‌جكسن داها،
بشريّتين قدرتلي وَ شن چاغي.
سلام اي قارا ظۆلمت باغريني ياران،
ايشيق قلبلي دوغرو ايلقار سئوگيلي،
شرف اوغروندا اي اؤز جانينا قييان!
انسانلار اؤترۆ، ائل اؤترۆ، اوبا اؤترۆ،
يانار اودلارا دۆشۆب، اودلانيب يانان.
سلام اي گؤزه‌ل وئرگيسي طبيعتين،
آرزو - ديله‌گي هر گۆلۆن چيچكلرين
يۆكسك داهي‌‌سي شانلي بشريّتين،
آخيجي سسين قالخاجاق سمالارا
آردينجايام اي بۆلبۆلۆ محبتين ...
كيچيك
شعرلر - ص 11 - 25 / 12 / 45 - تبريز.
