منله اكيلن آلچا آغاجي،
اگله‌نيب باردان يئنه بوداغين.
ساللانيب يئنه تورش آلچالارين،
قاماشميرمي بس سنين دوداغين؟
سنه وار منيم بير خوش خبريم،
قولاق وئرگيلن دئييره‌م دۆزۆن.
آنام دئييركي هر ايكيميزده،
ايگيرمي ياشا دولموشوق بوگۆن.
آناما گؤره، من اولان گۆنده،
سن بوي آتيبان چيخيبسان دۆزه.
منله ياشاييب منله قاليبسان،
منله ديل آچيب گليبسن سؤزه.
سؤيله گؤرۆم بو كئچميش ييرمي ايل،
اۆره‌گينده سن نه بسله‌دين بار؟
ايچدينمي هانكي ديلك شرابين،
قالدي گؤزۆنده هانكي آرزولار؟
سؤيله گؤرۆم بو كور ياشاييشا،
بيلدينمي نئچۆن گليبسن آلچا؟
يانكي‌لرين هئچ قانلي اليندن،
بۆكۆلمۆش قدين گؤردۆمۆ هاچا؟
سؤيله گؤرۆم بير بو ياشاييشين،
ديبي هارادير باشيسا هارا؟
بو حكومتدن هئچ اۆره‌گينه،
ده‌گديمي مينلر اؤلۆمجۆل يارا؟
هر ايكيميزين عؤمۆرۆمۆزدن،
ايندي ييرمي ايل اؤتۆبدۆر آلچا.
سؤيله گؤرۆم بير ايسته‌كلريندن،
آچيبديرمي نه قوينوندا قونچا؟
آلچا، طبيعت بيزي دوغاركن،
وارليغيميزا نه تدبير قيلدي؟
آلنيميزين كور نقطه - خطلرين،
كيملر اوخويوب، كيمسه‌لر بيلدي؟
آلچا درد - غمين ايز قاليقلاري،
سنينده پوزغون ده‌رينده واردير.
ييرمي ياشيندا سن‌ده قوجاسان،
سنينده اولما بو دۆنيان تاردير؟
آلچا نه اۆچۆن پوستون قاراليب،
ظۆلمت سني ده باسقينلاييبمي؟
اولما اۆره‌گين يانغين اولوبدور،
سۆره‌ره‌ك من تك مينلر درد - غمي؟
نه اۆچۆن سنه رغبت گؤرۆنمۆر؟
نه اۆچۆن تورشدور كؤنلۆنۆن باري؟
اولما ائللرين گؤزۆندن ساليب،
سۆرگۆن ائديبدير سني‌ده تانري؟
گؤرۆره‌م سنين بارين آغيركن،
ان قيمتلي‌دير داها زنگين‌دير.
قول بوداقلارين زوردان اگله‌نيب،
بو رغبت گؤرمز بارلار سنگين‌دير.
سؤيله گؤرۆم بير ياشيديم منيم،
قالخاجاقسانمي آخر هاراجان؟
يورولوب، دوروب، قاييداجاقسان،
يا قاچاجاقسان آلچا ياراجان؟
آلچا ديشقاردان قوجاسانسادا،
حله گنجسن، حله جاوانسان.
تاتلي چيچكسن، طراوتلي‌سن،
تيكانلار ايچره مين گۆلۆستانسان.
آلچا دۀ گؤرۆم دوغاجاقمي يوخ،
بورادا او شن او پارلاق گۆنش؟
قوربان آلاجاق مينلر پروانه،
كؤنلۆمده چاخان سؤنمز بو آتش؟
آلچا دۀ گؤرۆم يئنه قالاجاق،
دوداقلاريندا قورو سئودالار؟
بو دۆزۆك‌لردن يئنه سولاجاق،
قوينوندا آچان تازه ايلك باهار؟
دۀ گؤرۆم هاچان بيته‌‌‌جك هجران،
چاتيشاجاقسان نه واخت يارينلا؟
ائده‌‌‌جكسن بس هاچان آي آلچا،
هانكي آغيزي شيرين بارينلا؟
دۀ گؤرۆم هاچان اۆستۆندن گئده‌ر،
آغير تپيكي ياد قوناقلارين؟
دۀ گؤرۆم هاچان شاد نغمه قوشار،
قوينوندا سيزان بو درتلي تارين؟
آلچا دئييرلر پاييز واختيندا،
سنين تورش بارين چوخ شيرين اولار،
ده‌ريسي پارتلار، بال چؤله پيرتلار،
دونون باش-آياق قيرميز بويانار،
سنين ال چاتماز بوداقلاريندا،
قيزيل بايراقلار يئلكن قالديرار،
بير اوشاق سالار بير - بير داش ايله،
سونرا اۆستۆنه آغير قار ياغار.
كيچيك
شعرلر - ص136 - 16 / 4 / 1344 .
