نه يوغورت

             هئچ نه ايسته‌ميرم!

ديليم بار گتيريب،

بوغازيم توتولوب

يئمه‌گه مئيليم يوخ!

هاوا چيسگينلي، دومانلي،

توتقوندور، مئه‌ليدير

منيم آغ دسماليم لكه‌لنمه‌دي

درماندان گول بيتدي قيراقلاريندا

. . .

قوي ياتيم، بو قده‌ر ناغيل دانيشما

نه قوروت

        نه يوغورت

             هئچ نه ايسته‌ميرم!

يئري چيخ گئت گؤراخ!

اؤزونو سريمه!

لوس آنجلس،

        مالمو،

             گوته‌بورگ!

بسدير داها.

گؤزلريمه يوخو گلمير منيم هئچ

آغلاماقدان هولو كيمي اولوبلار!

سن نييه ياتميرسان؟

او گؤزل قيرميزي گئييملي قيزيم

او كؤرپه بالام!

گونشلي يازيم!

- ائلنازي دئييرم-

اللريم اوستونده اؤلنده،

اهه!

هارا گؤنده‌ريرسن مني سن يئنه؟

بير باخ آياقلاريما

يورولدوم والله

بسدير داها!

سنين سوسغون دوداقلارين،

منيم هولو كيمي گؤزلريم

بيرده كؤرپه‌ اوشاغيم!

اهه!

باشينا شاليني سالميرسان داها

آ توركمن قيزي!

گل اؤز غرورونلا

يايي ‌دا

        قيشي دا

             تسخير ائيله‌گيل

قوي شؤوقون بوروسون گؤلون اؤزونو

سولار اوسته اگيل

آ توركمن قيزي!

آق قالا كؤكسومون بير جاناغيدير

سنين دادلي سؤزون اوره‌ك – ياغيدير.

آ توركمن قيزي!

ياغي آتين چاپير دره‌ده دوزده

نييه آغلير سنين بيريجيك كؤرپه‌ن؟

گؤروره‌م آتيني ياواش سورورسن

باشينا شاليني سالميرسان داها!

آ توركمن قيزي!

دام دادام!

دا دام،

دام دادام!

دا دا دا،

دام دادام!

دا دام،

دام دادام!

ظولمون اؤركه‌نيني قيراجاغام من،

دا دام،

دام دادام!

آيدين گله‌جگه چيخاجاغام من،

دا دام،

دام دادام!

ايشيقلي دونياني گؤره‌جه‌گم من

دا دام،

دام دادام!

آزادجا شن عؤمور سوره‌جگم من

دا دام،

دام دادام!

منه بورج وئر اونو

والله

- آند ايچيرم –

سنه لاپ ساليم قايتارارام.

نييه قيسقانيرسان؟

قارانليق دونيادا قالميشام ايللر

باشيمين اوستوندن اسيب ساووشوب

                   سام يئللر

دان يئريني هامي گؤستردي منه

آمما كيمسه

        هاني؟

             وئرمه‌دي كي!

سنين اوچون دان يئري وارسا

منه بورج وئر اونو!

ياديندامي نئجه سرخوش ايديك بيز

دان يئري هوه‌سيله

آتلانيرديق هرگون،

اويناييرديق هرگون،

يئنه مئيليم واردير،

هوه‌سيم واردير،

قورومادي عشقيم.

سنين اوچون بيرجه

             دان يئري وارسا

منه بورج وئر اونو

قوي من‌ده سيناييم

دان يئريني،

دان يئريني . . .

آ . . . ه!

منه سؤز وئرميشدين.

بس نه اولدو عهدين؟

نييه سينديردين اؤز عهد و پئيمانين؟

گل اؤز يايليغينلا

گؤز ياشيمي سيل

اولدوزلار گؤيلردن دوشه‌جك

                   اينان!

بير- بير ساللاناجاق كالاغاييندان.

ايللردير ياغيشا سؤز وئرميشم كي

بسله‌يم اكديگيم گول نهاللاريم

گل گؤر نئجه ياغيش دؤيور باشيما.

نييه سينديردين اؤز عهد و پئيمانين؟

نه دئييم ياغيشا؟

عهد و پئيمانيوا نه سؤز سؤيله‌ييم؟

منله سن گؤزه‌ليم پئيمان ائتميشدين،

منه سؤز وئرميشدين . . .

گؤردوكلرين، بيلديكلرينه،

سؤيله كي سئويرسن،

        سئويرسن مني

گل يول يولداشي اول

دنيزه چاتاق.

بيز اوزون يوللارين يولچوسويوق

                   باخ!

نه اولدو؟

نييه بس اوزاقدا قالدين.

آتلان گل!

هاميني آتلانديرارام

هامي‌نين الينه سيلاح وئره‌رم.

گل منه ساري

گل سني گؤزله‌يير قارا باليقلار.

سؤيله گؤردوكلرين

        بيلديكلرينه

سؤيله كي سئويرسن،

        سئويرسن مني.

من قالخيب اوجاليب.

        چينار اولموشام

گل يول يولداشيم اول

دنيزه چاتاق.

نه قده‌ر بو گئجه گؤزه‌للـه‌شيبسن

اوتورما گؤزه‌ليم

        اوتورما بير آن

بير داها دور گل!

بير بئشه،

بئش بيره!

دايان! داريخما!

اونلارين الينده تانك وار، توپ وار،

             گوللـه وار، مرمي وار . . .

آمما سن نه قده‌ر گؤزه‌للـه‌شيبسن

بير داها دايان!

        دايان،

        دايان، داريخما!

بير داها توپلاناق

بير داها داياناق

قاچماياق،

داياناق

من سني سئويرم

دنيزده آي كيمي.

سنه ساري آخيرام

بولودون آرديندان

نه كم باخيرسان

گل منيم هاييما

بير داها داياناق

بير داها توپلاناق

قاچماياق،

        داياناق!

             داياناق!

                   داياناق!

نه قده‌ر بو گئجه گؤزه‌للـه‌شيبسن

اوتورما بير آن . . .

2/3/1386

آخماجا آخير،

قايالار دوروب ديك باخير.

منيم اسراريمي آخماجا بيلير

او، چايلاقلاري يووب گتيرير.

سني چايلاقلاردا من بسله‌ميشم

عشقيمي چايلاقلا

             دفن ائيله‌ميشم.

اسراريم چايلارين آلتيندا قاليب.

چايلار آخماجايا دؤننده گؤزل.

سن منيم سيرريمي

             آخماجادا گؤر.

آخماجا قوروماز

        چاي آخار دائيم.

چؤللري آرخادا قويدو،

        دنيزه ساري آخدي گؤزه‌ل

سني من رؤيالاريمدا گزديرديم

خيالدا جانلانديرديم.

سونبوللو زميلري اؤتدوم

داغدان

        يالدان

قايادان كئچديم.

بيچينچيلرين تري ايله ايسلانديم

يايلاقلاردان چؤللره

        دوشدوم.

منيم وحشي عشقيم

        چؤللري آرخادا قويدو

             دنيزه ساري آخدي گؤزه‌ل

ايندي باليق قولاغي ييغيرام، گؤزه‌ل!

دنيزين قيراغيندا

سني خياليمدا جانلانديريرام.

تئز اول،

مني بوردان گل آپار،

گل آپار

        اوزاق يولا.

گؤم گؤي او

        ياشيل داغا.

يار كنده

        كاشغره،

گل آپار اوزاق يولا.

دوغو كرواني!

تئز اول!

مني آلتون قايالار

گؤزله‌ييرلر،

يئيين اول!

باجارارسان بيليرم.

دوغو كرواني

تئز اول!

2/ 8 / 1387