سئوگي سئچمكده من اينان چاشمارام،
كؤنلۆم قاپيسين هر كيمه آچمارام.
سني من سئويرم صحبتين اۆچۆن،
دۆزلۆگه وئرديگين قيمتين اۆچۆن.
سن منيم آنامي ياددان قورودون،
بو يولدا اوساندين جاندان چۆرۆدۆن.
خلقيمه بسله‌دين درين بير اينام،
محبت دفترين ائيله‌دين تامام.
مقاما
شهرته سن آلدانمادين،
يالتاقلار تكي اؤز ائلين دانمادين.
سارايا شاهلار قوشما يازمادين،
آغير گۆنلرينده يولدان آزمادين.
ياد ايشكنجه‌سيندن ديزه چؤكمه‌دين،
حققي سئومكدن سن الين چكمه‌دين.
خلقيوين اوغروندا اؤز وظيفه‌ني،
يئرينه يئتيردين بير اوغول كيمي.
حقلي‌يم من سني سئوسم نه قده‌ر.
قولاق وئر كئچميشدن وئريم بير خبر:
من بو شن دۆنيادا حله يوخ ايكن،
وطنيمده گۆنش دوغولدو بيردن.
آغير بير توفاندان كئچميش شفقلر،
قيزيلا بله‌دي يوردو نه ته‌هر!
آذربايجان اوغلو حققينه يئتدي،
بيره‌ر – بيره‌ر شاهليق ايزلري ايتدي.
باشلادي سعادت بيناسين قورا،
سعادت نغمه‌‌سين يازيب اوخويا.
چيخدي چوخ شاعيرين اوندا آدلاري،
فطرتلر، اميدلر، و باشقالاري.
قاباقجا سارايي سۆسله‌ين اللر،
ايندي‌ده يازديلار ملّته سؤزلر.
گۆنلر كئچدي، آيلار اؤتدۆ، ايل اولدو،
بيردن آذر آيي فيرتينا قوپدو.
يئنه يادلار بيزه حاكم اولدولار،
شئرلر مسكنينه بير - بير دولدولار.
يئنه‌ده ملّتين حاققي ازيلدي،
«اميد»لر سارايا يئنه ديزيلدي.
يئنه شاعير گليب يالتاقليق ائتدي،
تنعّم ايچينده اؤزۆندن گئتدي.
آناديل، خلقليك، تام ناغيل اولدو،
آنامين قوينوندا چيچك‌لر سولدو.
شاعيرلر ياد ديلين يۆكسك ديل ساندي،
امپراتورلوغو حقلي ايناندي.
او زاماندان، بئله سن وطنيمده،
داياندين، يورد سالدين اؤز چيمنينده.
آغيرگۆنه، سينيق لامپايا دؤزدۆن،
ائليوه خلقيوه شعرلر يازدين.
دۆزگۆن دويغولاري گؤستردين ائله،
مترقي سؤزلر گتيردين ديله.
«كؤشن» شاعيريني نه ياد بيدادي،
نه ساراي، نه دربار آلدادانمادي.
انكشافيميزا چاليشدين بيزيم،
سن آچديغين ايزدير منيم ده ايزيم.
ايندي دۀ من سني نئجه سئومه‌ييم؟
نه اۆچۆن يازماييم نئچين اؤگمگيم؟
ازلي محبت اودو سؤنرمي،
گئرييه تاريخين چرخي دؤنرمي...
كيچيك
شعرلر - ص 38 - 10 / 12 / 1346 .
آرديني اوخو
