قارا توپراغا دۆشن رايتينه حيف اولسون‌!

قدر وئردينسه باهاسيزلارا اؤز قدرينله‌‌‌،

بيلمه‌دي كيمسه‌‌‌، سنين قيمتينه حيف اولسون‌!

شوكتي - عزّتي‌‌‌، آبرونو گيرو قويدونسا‌‌‌،

ذلّته چكدي سني‌‌‌، عزّتينه حيف اولسون‌!

نه‌دير ائل سئوگيسي‌‌‌، هئچ قانمادي اول آلچاق حريف،

بيرليگي پوزدو‌‌‌، ائلين وحدتينه حيف اولسون‌‌‌.

تانيمازميش او‌‌‌، شرف؛ بيلمز ايميش حيثيت‌‌‌،

آياغي آلتداكي حيثيتييه حيف اولسون‌!

ائلي‌‌‌، يادلارا نؤكر ائتمك ايله فخر ائله‌دي‌!

اونا امديرديگين اول پاك سۆتۆنه حيف اولسون‌!

دۆزگۆنۆن ووردو ساغالماز يارالار قلبيندن،

پوزولان ساغليغينا - صحّتينه حيف اولسون‌!

قاشقايي لوحه‌لري - ص  18- 1377.

جاني جانانا جاودان وئرديم‌‌‌.

غمي ايله يوغوردو كؤيلۆم [1] ائوين‌‌‌،

عؤمرۆمۆ هديه شادمان وئرديم‌‌‌.

اورجانا [2]‌‌‌، بولداچييا [3] گئتمك چۆن‌‌‌،

ساربانلارا آند - آمان وئرديم‌‌‌.

گلدي‌‌‌، غم غارت ائده كؤيلۆمدن‌‌‌،

يولدا دوردوم‌‌‌، يولونا‌‌‌، يان وئرديم‌‌‌.

دئدي: «قاشقائي‌ام‌‌‌، گپيم گپدير!» [4]‌

«دۆزگۆنم‌!» سؤيله‌ديم‌‌‌، آمان وئرديم‌‌‌.

قاشقايي لوحه‌لري - ص  17 – 1378.

بو يازيق ملتي‌مين دردينه درمان اولاسان‌‌‌.

اؤزۆنه بير گله‌سن‌‌‌، فخر ائله‌يم قامتينه‌‌‌،

خوبلار ايچره گزيب، سرور خوبان اولاسان‌‌‌.

گۆنشه يۆكسله بؤركۆم اوجو شيرازلي كيمي‌‌‌،

سن كۆلاهيمدا منيم درّ درخشان اولاسان‌‌‌.

آچاسان صورتيني پرده‌ي منحوسيندن‌‌‌،

بو قارانليق گئجه‌ميزده مه تابان اولاسان‌‌‌.

قارا توپراقلار اۆزۆندن دورا شمشاد قدين‌‌‌، 

يئنه‌ده مملكت جمشيده خاقان اولاسان‌‌‌.

اردبيلدن اوجاليب شاه‌ختايي كيمي سن‌‌‌،

فرمانين جاري ائديب تبريزه سلطان اولاسان‌‌‌.

او بويون قوربانييام بير گله‌سن محفيليمه‌‌‌،

گۆللر ايچره سۆزۆلن سرو خرامان اولاسان.

قيراسان خلقين آياغيندان اسارت ايپيني،

دۆزگۆنۆن باشين اوجالدان يئني انسان اولاسان.

اردبيل لوحه‌لري - ص  21 .

يارلا اغيارليق قيلان بو آشينايا باخگيلن.

قهر ايله ترك ائتديگي ويرانه دۆشمۆش يوردوما،

خصم توپراغيندا ياپميش مُلتجا‌يا باخگيلن. 

ائللري قورتارماغا بيگانه‌يه آچميشلار ال،

بيّنات‌‌سيز بو يالانچي انبيايا باخگيلن. 

صيدقيمي قلبيمدن آلماق آرزو ائيله‌ردي شئيخ‌‌‌،

راهزنليك ائيله‌ين بير رهنما‌يا باخگيلن‌!

گل تملق پرورانين وجه زشتين رد ائله،

قيل نظر آللاها‌‌‌، وجه كبريايا باخگيلن‌!

يوللاري يور شئيخ صفي‌نين بارگاهينا قده‌ر،

اردبيلده گزگيلن اوردا صفايا باخگيلن.

غيرت ملّي‌يه وارث اولگيلن دۆزگۆن كيمي،

لَيْسَ لِلاِنسانِ اِلّا ما سَعييا باخگيلن.

اردبيل لوحه‌لري - ص  21 – 1376.

قالماسا ديار‌‌‌، يار قالماز.

يوردون شرفين ايتيرسه كيمسه‌‌‌،

ناموس‌‌‌، شرافت‌‌‌، عار قالماز.

جمع اولسا گر اردبيل و تبريز،

آشفته بو روزگار قالماز.

سن ترك ائله‌سن منيم كناريم،

قلبيمده گؤزه‌ل قرار قالماز.

بير دفعه داها گؤز ائيله‌سن يار،

دۆزگۆن‌ده داي اختيار قالماز.

اردبيل لوحه‌لري - ص  19 - يورد غزللري - ص 16 – 1376.

او قاشين طاقينا دلبر هوسيم وار منيم‌‌‌.

تۆركم، آت اويناداراق فضل و صفا پايلاميشام،

ياركنددن[1] ويئنه ساري سسيم وار منيم‌‌‌.

اؤتۆكنده يئني سئي [2]، مُلك عجمده اترك‌‌‌،

ملك آذرده كۆرۆم وار‌‌‌، ارسيم وار منيم‌‌‌،

صفحه‌ي شعريمه باخديقجا‌‌‌، رقيبه دئييرم،

بير مسيحا دمي تك هم نفسيم وار منيم‌‌‌.

باخما غوربتده ساليب بي كس و يار ائتدي زامان،

آغير ائللر ساياغي يار و كسيم وار منيم.

تۆركتازي ائله‌سم ملك سخن ده‌‌‌، ياراشير،

چۆنكي ساهير[3] كيمي فرياد رسيم وار منيم.

تاكي گۆن سايه سالير‌‌‌، توپراغا دۆزگۆن ياشارام، 

اردبيلدن آلينان گۆر نفسيم وار منيم

اردبيل لوحه‌لري - ص  18 - يورد غزللري - ص 38 – 1376.

يئني كرپيچلر، اي افتخارلي ارك!

قول - بوداغين سينير‌‌‌، گۆللرين سولور،

دۆشۆرسن خزانا‌‌‌، نوباهارلي ارك‌‌‌.

آنالار باغريني يادلار داغ ائتدي‌‌‌،

گؤزلريندن قانلي ياشلار آخيتدي‌‌‌.

سنين حۆرمتيوي تهران داغيتدي،

شرفله اوجالان اي وقارلي ارك‌‌‌.

دئييرلركي بوردا گۆل گره‌ك سولا‌‌‌،

آباد گۆلزارلاري بايقوشلار آلا‌‌‌.

بيلمم نئچۆن داها مسلط اولا،

سنه بدكاره ياد، خوش رفتارلي ارك‌؟

دويار گؤزله اوجا نقطه‌دن باخان!

گؤرسن ياد اليندن حياتدا آمان‌‌‌،

گله‌جگه ساخلا بونلاري نشان،

سينه‌‌سي خزينه يادگارلي ارك‌‌‌.

كيچيك شعرلر - ص  27 - ياي 1346 .

آنام آغزي سولو قيش گئجه‌لري‌‌‌،

سندن چوخ ناغيللار دئيه‌ردي منه،

گؤز آچيب گؤره‌رديم آچدي دان يئري‌‌‌.

ايندي‌ده گئجه دير‌‌‌، قيش گئجه‌‌سيدير،

باييردا اگله نير بوداقلار قاردان‌‌‌.

قوش باشي سانمايير هئشجه، توپلايير‌‌‌،

دوداغيم پارتلايير آغير سكوتدان‌‌‌.

أن چيركين بير گئجه‌‌‌، نفرتلي گئجه،

باسيب بۆرۆيۆبدۆر يان - يؤره‌ميزي‌‌‌.

يوخلاييب قالميشيق كارواندن قيراق‌‌‌،

سحرين دان يئري‌‌‌، گل اويالت بيزي‌‌‌.

بيليرسنمي مني نه‌لر چولقاييب‌؟

گئجه بايقوشلاري قونوب يوردوما‌‌‌.

آغ آلاچيغيمين قيزيل بايراغي،

دۆشۆب گؤيدن يئره‌‌‌، سريليب يالا‌‌‌.

آچيل، آچيل سحر! محبّت ايله،

باسغين وئر گئجه‌نين قارا دئوينه‌‌‌.

آچيل، آچيل سحر! يول ايشيقلانسين،

خاطير جمع يوللانسين هر كس ائوينه‌‌‌.

دوغ سحر‌‌‌، دوغ سحر، قيزيل قانلا دوغ،

ياناشسين بير - بيره قوي اۆره‌گيميز‌‌‌.

محبّتدن دانيش، قاناد چال آزاد‌‌‌،

چيچكلنه‌جكدير شن ديله‌گيميز‌‌‌.

اۆره‌گيم آجيدير‌‌‌، سوسوزدور‌‌‌، يانقي،

ايستي ليك باغيشلا اونا اود ايله‌‌‌.

قويما دوشسون ايشدن‌‌‌، اوياندير‌‌‌، قان تؤك‌‌‌،

قارا گئجه بوردا حاكيمدير حله‌‌‌.

كيچيك شعرلر - ص  26- 1353- مشكين شهر .

باجاريقلي أللريوين دؤورۆنه.

تيتره ينده سازين‌‌‌، متين روخسارين،

يول آچميشدير من چۆن سحر شهرينه‌‌‌.

بارماقلارين آخينتي‌‌سي آچاجاق،

كؤنلۆمده كي آچيلمايان سيرلري‌‌‌.

سيملري‌نين اينجه - نزيك سسينده،

جانلاناجاق املمين دفتري.

دئسم يارير سيزيلتي‌‌سي تاريوين،

قيزيل دامار اۆره‌گيمي أن درين‌‌‌.

اينان ييرتيب بوياييرلار آلقانا‌‌‌،

اؤپوشنده دالقالاري سسيوين.

بير حادثه‌‌‌، بير ديريليك‌‌‌، بير اؤلۆم،

بيلمم هاچان قويدو سني قارشيمدا‌‌‌.

ياديمدادير آنجاق بوكي او گۆنۆ،

قولدورلارين زهري وارميش آشيمدا‌‌‌.

ياديمدادير آنجاق‌‌‌، او گۆن دويموشدوم،

چاغريلماميش قوناقلارين گليشين‌‌‌.

گؤرمۆش ايديم آنام له شي اۆستۆنده،

ياد ائللي‌لر آتلي‌‌سي‌‌نين يئريشين‌‌‌.

او گئجه‌يدي «آريا» لارين قوللاري -

اللريله پارچالاندي نغمه‌ميز‌‌‌.

بلكه سنين نغمه‌لرين ايچينده،

گؤردۆك دورو بير ماوي گؤي‌‌‌، ان تميز‌‌‌.

گئجه ايچره گل نغمه‌ني قالديراق‌‌‌،

اوجاق قوراق‌‌‌، ناقوس چالاق يوللاردا‌‌‌.

اويانديراق يولچولار‌‌ي، دينله‌يك،

سالاق قارا گئجه ايچره سس - صدا‌‌‌.

كيچيك شعرلر - ص  25 .

سئوگيلي جانانيم اونودما مني‌‌‌.

آيريليق سؤزۆنۆ سؤيلمه، آمان!

مني ياشادانيم، اونودما مني‌‌‌.

قيزيل گۆل دوغاندا مني ياد ائله‌‌‌،

فعله‌لر قالخاندا مني ياد ائله‌‌‌.

انقلاب اولاندا مني ياد ائله‌‌‌،

اي گؤزه‌ل انسانيم اونودما مني‌‌‌.

قوّت آل‌‌‌، جرأت آل محبّتيمدن‌‌‌،

سني من سئوميشم‌‌‌، من سئوميشم‌‌‌، من‌‌‌.

قهرمان گؤزله‌يير بو گؤزه‌ل وطن‌‌‌،

منيم قهرمانيم اونودما مني‌‌‌.

كيچيك شعرلر - ص  24- ياز 1351 - تبريز زنداني .

ياتاغيم‌‌‌، اوتاغيم داغيليب منيم‌‌‌.

«فۆرصت»يم أليمدن گئتدي نئجه كي،

ايللردير گئديبدير ألدن وطنيم‌‌‌.

منه اؤز قوينوندا بو گئجه يئر وئر،

تبريز قيراغيندا قالان قورو گؤل،

بو چؤل قاريش - قاريش آشنادير منه،

آشناليق اولوبدور يالان قورو گؤل‌‌‌.

گؤره‌سن فۆرصتيم نه ائدير ايندي‌؟

هئچ گؤرۆنمۆر اونون ايشيغي آيدا‌‌‌.

دئييرلر دوستاقدا تاردا دوزه لديب،

چالير دوستلار اۆچۆن او بويدا – بويدا‌‌‌.

بۆتۆن انسانلارين سعادتيني،

گؤزه‌ل اللريله ترنّم ائدير‌‌‌.

هر زخمه ووردوقجا بير دؤنۆب دالي،

شيرين - شيرين باخيب تبسم ائدير‌‌‌.

وسعتلي اۆره‌كلي «هوشنگ فۆرصت»،

داريسقال زنداندا محبوس اولوبدور‌‌‌.

قانلي داعوالارا حله دۆشمه‌ميش،

فاجيعه گؤرمه‌ميش يامان سولوبدور‌‌‌.

آزادليق حسرتلي دارتينان قلبي،

سؤكۆلۆر تؤكۆلۆر تار چالاندا او‌‌‌.

من اؤزۆم اؤزۆمدن چوخ اوتانيرام

هر نوروز زنداندا تك قالاندا او‌‌‌.

ايشكنجه آلتيندا‌‌‌، چوخ بازجولارين،

عيناديله فيكرين تالادي فۆرصت‌‌‌.

قارا دوستاقلاردا دار سيللوللاردا،

ايللري ايللره جالادي فۆرصت‌‌‌.

من اونون ايستيرم اينجي نغمه‌‌سي،

هاوايا قالخاندا آلقانا دؤنسۆن‌‌‌.

من اونون ايستيرم اوخودوغو شعر،

قانلي بير دنيزه‌‌‌، عمّانا دؤنسۆن‌‌‌‌‌‌.

ايستيرم كي اونون گؤزه‌ل آديله،

قيزيل شفقلرين ايچينده اوچام‌‌‌.

ايستيرم دالينجا دارتينيب وارام‌‌‌،

ايشقيلي گۆنلرين قاپي‌‌سين آچام‌‌‌.

كيچيك شعرلر - ص  24- ياي 1354 - قوروگؤل .

واي آمانسيز خزان نه واختسيز چاتدي‌‌‌.

لاله‌لر بيچيلدي‌‌‌، قانلار تؤكۆلدۆ‌‌‌،

تورونجو گۆن آخيب اۆفۆقده باتدي‌‌‌.

قوي سنين فيكرينله من شن ياشاييم،

عشقين قوللاريما قوت باغيشلير‌‌‌.

قوي ائله بيليم كي سن يانيمداسان‌‌‌،

نفسين شعريمه جرأت باغيشلير‌‌‌.

بو خياللاكي سن مني آتمازسان‌‌‌،

ظۆلمۆ ايشكنجه‌ني بلكه اونودوم‌‌‌.

بو گۆنلر آخ نئجه سنسيز قالميشام‌‌‌،

اي منيم وقاريم‌‌‌، منيم اومودوم‌‌‌.

قوي دئييم انسانا سعادت وئره‌ن،

قانلي بير گۆنشي گتيره‌‌‌جكسن‌‌‌.

قوي دئييم آغالار شرلر اؤنۆنده،

باشيني هئچ زامان أگميه‌‌‌جكسن‌‌‌.

هاله سال شعريمه‌‌‌، اودلارا دؤنسۆن‌‌‌‌‌‌،

سنين محبّتين جان وئرير منه‌‌‌.

آماندير مزاريم اودلانار‌‌‌، يانار‌‌‌،

بو جانيم يانماسا وطنه‌‌‌، سنه‌‌‌...

قوي دئييم دؤزۆلمز آغير گۆنلرده،

سن چيگين چيگينه منيمله وارسان.

قيرميزي بير گۆنده‌‌‌، مزاريم اۆسته،

فيكريمي ياشادان دؤنمز نيگارسان‌‌‌.

كيچيك شعرلر - ص  23 .

اؤنۆنده ياد اگيله‌جك،

اوغوللارين سئويله‌جك،

شن گله‌جك‌‌‌، تئز گله‌جك‌‌‌،

آنا وطن‌‌‌، آنا وطن‌!

عطيرليدير قوينون سنين‌‌‌،

گۆلـله‌نجك دره‌لرين‌!

گئده‌‌‌جكدير دردين - غمين‌‌‌،

ديلكلريم آچار چيچك‌‌‌،

آنا وطن‌‌‌، آنا وطن‌!

ياد باغيرير يالان - يالان‌‌‌،

منه دئيير: بيزه اينان‌!

ائتمير بونو اصلا گۆمان‌‌‌،

سندن اولماز هئچ ال چكمك،

آنا وطن‌‌‌، آنا وطن‌!

بولاقلارين سرين سنين‌‌‌،

چشمه‌لرين درين سنين‌‌‌،

اوجا ذيروه يئرين سنين،

ان گؤزه‌لسن‌‌‌، بونو بيلك،

آنا وطن‌‌‌، آنا وطن‌!

سن منيم‌سن‌‌‌، منيمكي‌سن‌‌‌،

سن بير ايدين‌‌‌، بس ايكي‌سن‌؟

اۆره‌گيمده سن‌‌‌، تكي سن‌‌‌،

يئر دوتوبسان، بئله گره‌ك‌!

آنا وطن‌‌‌، آنا وطن‌!

گؤزه‌لليكده بير دنه‌سن‌‌‌،

منجه، دۆنيا تكي سنسن‌‌‌.

آنجاق سنه باغلييام من‌‌‌،

صرف ائتميشم بوردا أمك،

آنا وطن‌‌‌، آنا وطن‌!

داغلاريندا گۆل آچاجاق‌‌‌،

قيزيل گۆنش نور ساچاجاق‌‌‌.

ايشيغيندان قورد قاچاجاق‌‌‌،

او گۆنه گل كؤنۆل وئره‌ك،

آنا وطن‌‌‌، آنا وطن‌!

قان رنگينده بايراغين وار‌‌‌،

دۆنيالارجا نؤوراغين  وار‌‌‌،

ياز نفسلي مين داغين وار‌‌‌،

من قويموشام بوردا اۆره‌ك‌‌‌،

آنا وطن‌‌‌، آنا وطن‌!

كيچيك شعرلر - ص  6 .

هر گۆن سحر - سحر سيلر‌‌‌.

توزون آلار‌‌‌، پاريلدادار‌‌‌،

دوروب بير آنليق سئير ائده‌ر‌‌‌.

تيكر يورغون گؤزلريني‌‌‌،

سانكي دالار كئچميشلره‌‌‌.

آغ بيرچكلي قادين آنام،

هئچ باخيشين سرمز يئره‌‌‌.

باشي اوجا‌‌‌، گؤزۆ ديري‌‌‌،

لاله‌سينه باخار‌‌‌، باخار‌‌‌.

باخيشي‌‌نين وسعتينه،

يولدان گلر گۆللۆ باهار‌‌‌.

گؤزلري‌نين شعاع‌سيندا،

دؤزۆملردن نشانه وار‌‌‌.

دوغرولوقدان‌‌‌، دۆزگۆنلۆكدن‌‌‌،

صداقتدن ترانه وار‌‌‌.

آذربايجان ائللري‌نين،

آناسيدير منيم آنام‌‌‌.

قلبدن قوپان شعرلريمين،

آيناسيدير منيم آنام‌‌‌.

قلبينده ذره‌جه توز يوخ،

تميز بيللور لاله‌‌سي تك.

صافدير‌‌‌، تميزدير‌‌‌، آري دير،

كؤكسۆنده آليشان اۆره‌ك‌‌‌.

زنگان لوحه‌لري -  ص  71 - 11 / 3 / 77 .

شاه بولاغي سويون ليلدي‌‌‌.

بير ايچيم سو ايچنمه‌ديم‌‌‌،

حسرتينم نئچه ايلدي‌‌‌.

اولارام من سنه برده‌‌‌،

سن نرده‌سن‌‌‌، اوغلون نرده‌‌‌.

درمانسان هر غمه‌‌‌، درده‌‌‌،

سندن آخان قيزيل گۆلدۆ‌‌‌.

سؤز قوشدوم اۆره‌ك داغلاديم‌‌‌،

غصه دن چلنگ باغلاديم‌‌‌.

چوخلارينا من آغلاديم‌‌‌،

درديمي تك دۆزگۆن بيلدي‌‌‌.

زنگان لوحه‌لري - ص  13 .