بير كولون ديبينده بير توراغايي،
باغلاميشدير يووا ايپك – حريردن.
قويموشدور اوردا اۆچ چيل - چيل يومورتا،
سانكي آلماس، رنگي قيزيل - گۆمۆشدن.
ناخيردان آيريلميش بير قيزغين اينك،
كل‌لري قاچيرتميش داليجا اورا.
يوللاميش ناخيرچي كيچيك اوغلونو،
زمي‌لر ايچيندن مالي قايتارا.
اوغلانين گؤزۆنه ده‌گميش بو يووا،
هوسله ال له ميش يومورتالاري.
آنجاق قويموش يئنه اؤز يئرلرينه،
سونرا ماللا قاچميش ناخيرا ساري.
توراغايي آخشام گليب سئيراندان،
اوخويا – اوخويا يووايا چاتدي.
ياخينلاشجاق دويدو تغيير ايسيني،
قيراقدا دوروبان فيكرته باتدي.
ده‌گيشيب يئريني كيم يومورتامين؟
كيم منيم يوواما ال اوزاديبدير؟
كيمديركي يووامين پرده‌سين ييرتيب،
وئريب يومورتالار يئرينده تغيير؟
فكرته دالاندان بير مدت سونرا،
بيردن قاناد چاليب گؤگه قاوزاندي.
توراغايي كۆسۆب يوردون بوشلادي،
اؤزۆ تيكن ائودن داها يانلاندي.
اورايا باسمادي بيرداها آياق،
دوغروسو باغلاميش اوزون بيركۆسۆ.
باشقا بير زمي‌ده ائوجيك قورولدو،
باشقا يئرده گئديب يومورتا قويدو.
توراغايي كۆسمه گل اؤز يووانا،
اۆچ يومورتان بوردا يالقيز قاليبلار.
اؤتن كؤنۆللري يوخسا يانديرما،
گل يومورتالاري اؤزۆنله آپار.
توراغايي كۆسمه قويماريق بيرده،
بير كيمسه يووانا الين آپارا.
سسينه وورولان حق عاشيقلاري،
سني آرزولايير اوچ گل بورايا....
كيچيك
شعرلر - ص 33 - 29 / 2 / 1344 .
آرديني اوخو
