غملر سني جانا گتدي،
رنگين اولدو ساري بولبول.
قلبين ظاليم قيش آولادي،
گل آغلاما باري بولبول.
كؤكسونده اودلاندي اوره‌ك،
گولونج اولور بوردا ايسته‌ك.
هاني كئچميش زامانلار تك -
باخچالارين باري بولبول.
نييه سئچدين سن ظولمتي،
قبول ائيله‌دين ذلّتي؟
بيلميردين بو حقيقتي،
قيشين اولماز عاري بولبول؟
قارا بولود يان گئده‌‌‌جك،
قهرمانلار قان ائدهجك.
گون داغدان قالخيب گلهجك.
اريده‌‌‌جك قاري بولبول.
عاشيق ترپه‌دجك سازي،
قالديراجاق خوش آوازي.
گؤره‌‌‌جكسن يايي – يازي،
اؤيه‌‌‌جكسن ياري بولبول.
بيليرم آخر ياز گلر،
گونش يئره نور سرپَلر.
يئنه گوللر عشوه ائيلر،
ائيلمه چوخ زاري بولبول.
گيرريك قيزيل گول باغينا،
بنفشه‌لر اويلاغينا.
يئتر يارين قولاغينا،
سن سيزيلدات تاري بولبول.
دوزگون دئيير دؤنه‌‌‌جك ايل،
ياناغيندان قان - ياشي سيل.
سازي گؤتور آچ گيلن ديل،
اوخو اوخو ساري بولبول.
كيچيك شعرلر - 12 / 11 / 46 هريس - ص 31 .
آرديني اوخو
