كؤنلۆمۆزۆ نه اۆچۆن يانديريرسان ياخيرسان سن
چاخماق بئله پارلاييب، بيردن بيره سؤنمك نه‌دير؟
حالتيوه تعجّبم، باش تاپميرام ايشلريندن
ايزه دۆشۆب گئديبن، غفلت حاللا دؤنمك نه‌دير؟
يا بير دفعه پارلاما، يا پارلادين داها سؤنمه،
قويما قالسين حسرتده بندلي‌لرين آخيل گؤزۆ.
ايزله‌يه‌ره‌ك چاخيشيني حالدان گئديب اۆزۆلۆرۆك،
سندن اؤترۆ اؤلۆرۆك، چاخماق بودور سؤزۆن دۆزۆ.
مرحمت قيل، قان ائتمه، بيردن چاخيب بيردن ياخما،
كسگين حاللا يانديرما ايتي تيغ تك جانيميزي.
آخي سنه نه چيخار بيزي گؤيه ساوورمادان؟
آجيق وئرمه يازيغيق، گل قاراتما قانيميزي.
چاخماق گل چاخ رؤشن قيل سؤنمه‌يه‌ره‌ك دۆنياميزي،
قارانليغين ايچينده اوسانميشيق جانيميزدان،
باغريني يار ظلمتين، گۆنه چيخارت بيزلري سن،
ظۆلمۆن - زورون اليندن جانا گلديك آمان! آمان!
نه‌دن اؤترۆ يارانيب بيزده اولان ايكي گؤزلر
گؤرمه‌يه‌‌‌جك دۆنياني، اولماغي‌نين نه فايداسي؟
نهايت كي فناسي وارليغي ايله فرقسيز گره‌ك،
بو حالتله قاراسا، يان - يؤره‌‌سي هم دۆنياسي.
چاخماق گل چاخ سؤنمه‌ده‌ن، ايشه وارسين
گؤزلريميز.
طبيعتده هر بيرزاد يارانيبدير بير ايش اؤترۆ.
حسرت ايچره قاليبان ايزله‌مكدن چاخيشيوي،
داي قالماييب قوّه‌لري آلماييبلار بسكي يوخو...
كيچيك شعرلر - ص
70 - 3 / 3 / 45 .
آرديني اوخو
