ائليمين آجييان ياراسييام من،
ال قوي نبضيمه گؤر هاراسييام من،
پارچالانميش قلبين پاراسييام من.
هر دونا
گيرسم‌ده يئنه دۆزگۆنم،
بو آد ايله
حققيم واردير اؤيۆنم.
دۆشمن وارليغيمي انكار ائيله‌دي،
قير آتيمي، بوز آتيمي پئيله‌دي.
منه تهمت ووردو، هر سؤز سؤيله‌دي،
ائلين قايغي‌سيني
باشدان آتماديم،
كئشيگينده
اوياق قالديم ياتماديم.
بو ائلين تاريخي كئچميشي تايسيز،
كلامي، هر سؤزۆ، هر ايشي تايسيز،
دوروشو، گليشي، گئديشي تايسيز،
آلدانما
اؤزگه‌نين ياغلي ديلينه.
آللاهيوا
باش اگ، باغلان ائلينه.
گلمه‌دي ديليمه بيرجه يالان سؤز،
دۆزگۆنم ايلقاريم دوغرو سؤزۆم دۆز.
سن‌ده اجنبي‌دن من تك الين اۆز،
گل ائله،
وطنه، يوردا گوه‌نك،
بوردا
گؤمۆلمۆشدۆر يۆزمينلر ديلك.
تبريز يوللاريندا - تهران - 1363 - ص 47.
آرديني اوخو
